Sâhil-serây-ı Beşiktaş'da bürûdet-i hevâ sebebi ile fîmâ-baʿd meks ü ikāmet müteʿazzir ve meyl-i nakl ü hareket, tabʿ-ı hümâyûnda zâhir olmağla, mâh-ı zilhicce evâyi- linde Beşiktaş'dan bi'd-devleti ve'l-ikbâl hareket ve Serây-ı âlî'ye bast-ı sâye-i ferr u şevket eylediler. Şehr-i mezkûrun onuncu gicesi resm-i dîrîn-i devlet ve tavr-ı pîşîn-i saltanat üzere Sadr-ı âlî-makām ve Şeyhulislâm ve sudûr ve sâ'ir ʿulemây-ı aʿlâm ve ricâl-i devlet ve ocağlu Serây-ı hümâyûn'a varup, âstîn-i Şâhâne'yi telsîm ve resm-i muʿâhedeyi icrâ vü tetmîm eyleyüp, Pâdişâh-ı kerrûbî-sıfât Sultân Ahmed Câmiʿi'nde edây-ı salât buyurdukdan sonra ʿinân-tâb-ı semt-i Serây-ı dil-güşâ ve icrây-ı sünnet-i dâhâyâ buyurdular. Tırhala Sancağı Mutasarrıfı Vezîr Yahyâ Paşa bu esnâda ʿâzim-i sûy-i bekā olduğu haberi, vâsıl-ı semʿ-i müdebbirân-ı devlet ve müşârun ileyh kesret-i mâl ile şöhret verdiğinden kabz-ı emvâline Kapucu-başı irsâl ve hareketinde istiʿcâl olundu. Müşârun ileyh Hekîm-zâde ʿAli Paşa Kethudâlığı'ndan neş'e-dâr-ı teʿayyün ve menâsıb-ı devletde izhâr-ı tefennün edüp, Vezâret'i hâlinde vardığı yerlerde sunʿ-i sehâ vü cûd ile memdûh ve nehhâb ü vehhâb iken, yine beyne'n-nâs gayr-i mezmûm ü makdûh olmuşidi. Moskovlu Özi senesi müşârun ileyhi giriftâr-ı kayd-ı isâr ve Çariçe'nin makarr-ı dalâlı olan Peterburg'a tesyâr eyleyüp, baʿde'l-musâlaha yine Vezâret'i ibkā ve bakıyye-i ʿömrü zevk u safâ ile intihâ ve güzergâh-ı olan mahallerde niçe nişîmen-gâh ve kusûr binâ eylediği meşhûr ve hâlâ baʿzısının aynı ve baʿzısının âsârı manzûr-i erbâb-ı şuʿûrdur.