Şehr-i mezkûrun on sekizinci günü Sadrıaʿzam tarafından Saʿdâbâd nâm mahall-i ferah-fezâda levâzım-ı ziyâfet âmâde kılınup, Şehriyâr-ı kerrûbî-sıfat, daʿvet-i Sadr-ı Felâtûn-menkabete icâbet ile sahn-ı Saʿdabâd'ı nümûne-nümây-ı sahn-ı cennet buyurdular. Mukaddemâ piyâde ocaklarından ihzârı irâde olunan tüfeng-endâzân, zâbitleriyle muntazır-ı emr ü fermân olmuşlar idi. Riʿâyet-i şerîta-i tekaddüm ü te'ahhur ile nişâna kurşun atup, kimî muhtî ve kimî musîb oldular ise dahi cümlesi nakd-gîr-i hisse vü nasîb oldular. Baʿdehû sâzendegāna ruhsat ve anlar dahi savt-ı gûnâ-gûn ile rûha kuvet verdiklerinden gayri perende-bâz ve küşt-gîrler dahi sanâyiʿ-i bedîʿiyyelerin icrâ ve tabʿ-ı hümâyûna ferah u beşâşet ilkā eylediler. Kubeyl-i ʿasrda nefs-i nefîs-i hümâyûn içün mâyide-i gûnâ gûn ve etʿime-i nefâset-makrûn bast olunup, baʿde't-taʿâm Sadr-ı ʿâlî-makām [M1 59] birkaç re's esb-i pür-zînet ve akmişe-i girân-kıymet, ʿarz-ı sâha-i Şehriyâr-ı pâkîze-tıynet edüp, hedâyâsı şâyân-ı nazar-ı iʿtibâr ve bir sevb-i semmûr ile Sadr-ı müşârun ileyh nâyil-i istibşâr olduğundan gayri, Şeyhülislâm Efendi dahi daʿvetde dâhil ve ol dahi ferve-i semmûr ile iltifâta nâyil oldu. Kethudâ Bey mürettebât-ı ziyâfete nizâm verdiğinden, hidmeti meşkûr ve Dârü's-saʿâde Ağası huzûrunda lâbis-i ferve-i semmûr oldu.