İşbu cumâdelûlânın dördüncü cumʿaertesi günü halîfe yerine rikâb ısmarlanup, Şeyhulislâm Efendi mukaddem vârid ve Sadrıaʿzam yedinden mühr-i hümâyûn nezʿ olunup, Yeniçeri Ağası Mustafa Ağa, mesned-i Kāyim-makāmî'ye sâʿid ve Ocağ-ı âmire'de silsile olup, her biri tarîkı üzere mahalline kāʿid oldu. Sadr-ı sabık bir gice Balıkhânede ikāmet ile dem-beste-i endîşe vü havf ve ferdâsı Kapucu-başı Selîm Ağa mübâşiriyyeti ile Midilli Cezîresi'ne sarf olundu. Eyâlet-i Anadolu tevcîh olunan Sadr-ı esbak ʿAli Paşa, Sadâret-i ʿuzmâ ve Vekâlet-i kübrâ'ya intihâb ve henûz Trabzon'dan hareket edemedikleri tehakkuku ile li-ecli't-tebşîr Hasekî Ağa şitâb etdirilmişidi. Hasekî Ağa o tarafa sürʿatle varup, îsâl-i nüvîd-i beşâret ve müşâr ile dahi fi'l-hâl hareket ve Cumâdelâhıre'nin on üçüncü pençşenbih günü resîde-i südde-i saʿâdet olacağı maʿlûm-i erkân-ı saltanat olmağla, muʿtâd üzere Mehmed Paşa köşkünde yemeklik tertîb ve yevm-i mezkûrda Şeyhulislâm Efendi ve Kāyim-mekām Paşa ve sâ'ir huzûrları ʿâdet olan ricâl, kudûm-i Âsafî'ye intizâr ile âmâde-i terhîb oldukları hâlde Sadrıaʿzam dahi gelüp, at üzerinde cenâb-ı Fetvâ-penâhi'yle muʿâmele bi'l-mücâmele resmini icrâ ve hem-ʿinân kasr-ı mezkûru me'vâ eylediler. Vüzerây-ı ʿizâm ve Sudûr-i kirâm tenâvül-i kahve ʿakabinde haymelerine ʿazîmet ve taraf-ı hümâyûndan resmen şeref-vürûd olan esb ile gelen Mîrahûr-i Evvel Ağa'ya ve müteʿallikalarına ilbâs-ı hilʿat ve sâ'ir erbâb-ı âlây Âsitâne'ye ʿavdet eylediler. Yalnız Şeyhulislâm Efendi ile ekl-i taʿâm ve sâ'irler dahi haymelerinde bu maslahatı itmâm eyleyüp, Sadr-ı vâlâ-câh ile Fetvâ-penâh hazerâtı sandal ile Yalı Köşkü'ne çıkup, maʿan huzûr-i lâmiʿu'n-nûr-i Şâhâne'ye vazʿ-ı cebîn-i ibtihâl ve Sadâret-i ʿuzmâ ile ihrâz-ı dest-mâye-i ʿizz u ikbâl eyledi. Bi'l-müşâfehe baʿzı vesâyâdan sonra müşârun ileyhimâya semmûrlar iksâ ve bi'l-mürâfaka Paşa-kapusu'na gelüp, resm-i ʿâdî icrâsından sonra [M1 51] ʿumûm haftanları giydirülüp, erbâb-ı menâsıb ibkā olundu.