Müşârun ileyh Meşîhat'ten infisâlinde, Burusa'ya iclâ olunup, mütâlaʿa ve teʾlîf ile terk-i meşgale-i dünyâ etmişiken, işbu cumâdelûlâ evâyilinde hirâmân-ı Ravza-i cinân oldu. Müşârun ileyh iki defʿa Sadr-ı Anadolu olan Birgili Hasan Efendi'nin kuvve-i bâsıra-i ibtihâcı ve deycûr-i hâne-i emelinin fîrûzende-i sirâcı olup, peder-i vâlâ güherleri terbiyesiyle mukaddimât-ı ʿulûmu zihninde ke'n-nakş-ı fi'l-hacer eyledikde, Medrese Ruʾûsu'na nâ'il ve devre-i maʿlûmeyi tekmîl ile Yenişehir-i Fenâr Mevleviyyeti'ne vâsıl olmuşidi. Yüz kırk bir târîhinde Burusa hükûmetiyle defʿ-i hüzn ü lehf ve o târîhde Mekke-i mükerreme Pâyesi'yle dâric-i medâric-i ʿuluvv ü şeref olup, kırk sekizde İstanbul'a Kadı ve hükûmetinden ʿâlem râzı olduğundan, şeref-i tekerrür ile seyf-i meslûl-i hükûmeti nâfiz ve mâzî olmuşidi. Yüz elli iki sâli zilhiccesinde Sadr-ı Anadolu ve altmış bir senesinde Sadr-ı Rumeli olup, her birinde on altışar mâh istikrâr ile sudûr-i sudûru dağdâr edüp, altmış iki şaʿbânında Şeyhulislâm ve hallâl-ı müşkilât-ı enâm oldu. Tabîʿatlerinde olan fezâzet ü huşûnet hasebiyle sene-i âtiye cumâdelâhırasında ʿazl ve Burusa'ya iclâ olunup, târîh-i mezkûrda intikāl ve emr-i irciʿîye imtisâl eyledi. Müşârun ileyh ʿâlim [M1 50] ü dânâ, fâzıl-ı bî-hemtâ, âsâr-ı kalem-i müsellem ve ʿilm ü edebde akranı tâlî, kendi mukaddem idi. ʿAynî Târîhi'nin bir kıtasını tercüme edüp, ifâde-i merâm ve sebk-i kelâma kādir olduğu eser-i mezkûrdan zâhirdir. Dâhil-i meʾvâ ola İnnâ ileyhi râciʿûn (داخل مأوى اوله انا اليه راجعون) fevti târîhidir.