Cülûs esnâsında mehd-i ʿulyâ hazretleri tarafından makām-ı Sadâret-i ʿuzmâ'da bulunanlara kürk ve hançer vürûdu ʿâdet olduğundan, şehr-i mezkûrun dokuzuncu günü bir kabza mücevher hançer ve bir sevb-i semmûr kürk kahveci-başıları yediyle şeref-resân-ı vürûd olup, Sadr-ı muvakkar ferveyi der-ber ve hançeri zîb-i kemer ve hükm-i mutâʿlarını sûde-i hadeka-i nazar edüp, Kahveci-başı'ya semmûr kürk ve donanmış esb ve bin altûn ve maʿiyyetinde olanlara tevzîʿ içün beş yüz guruş ve Dolab Halîfesi'ne müstakıllen beş yüz guruş iʿtâ ve şîme-i ʿubûdiyyet icrâ olundu. Bir sâʿatden sonra cenâb-ı Fetvâ-penâhî'ye dahi müşârun ileyhâ hazretleri tarafından kâtipleri vesâtatıyla bir sevb-i semmûr kürk gönderilüp, irsâl ve ʿadem-i irsâli mufavvaz-ı re’y-i Sadr-ı ʿâlî kılındığı, me’âl-i hükm-i şerîfden istidlâl ve kâtib-i mûmâ ileyhe Bâb-ı ʿâlî'den âdem terfîk olunup, zikr olunan kürkü Şeyhülislâm Efendi hazretlerine îsâl ve ʿavdetinde yine kapuya gelüp, taraf-ı Sadrıaʿzamî'den beş yüz guruş ʿatıyye hemyân ümmîdine nihâde ve mutayyeb ü memnûn iʿâde olundu.