Şehr-i ramazân gâyete resân olup, leyletü'l-ʿîd, erkân-ı Devlet Serây-ı hümâyûn'a ʿazîmet edüp, ʿale's-seher Şehriyâr-ı ferhunde-eser taht-ı ʿâlî-bahta zîb ü fer verdikde, tabakāt-ı nâs vakt-i nevbet ihtilâs etdikçe riʿâyet-i rüteb ile dâmen ü âstîn-i Hüdâvendigârî'ye leb-nihâde-i edeb ve resm-i mezkûr nihâyet buldukda, Şehriyâr-ı vâlâ-neseb yevm-i ʿîde mahsûs debdebe-i Mülûkâne'leriyle Sultân Ahmed Câmiʿi'nde edâ-yı salât-i ʿîd ve tahsîl-i rızây-ı Rabb edüp, Serây-ı ʿâlîlerine râciʿ ve Dârü'l-hilâfelerin kudûm-i hümâyûnlarıyle eşref-i mevâkiʿ buyurdular.