Ramazân-ı şerîfin on beşinci günü daʿvetleri muʿtâd olan Sadr-ı aʿzam ve sâ'ir ʿulemâ ve ricâl-i Devlet Serây-ı hümâyûn'da ictimâʿ ve ihtifâl ve takbîl-i Hırka-i şerîfe ile yümn ü bereket istihsâl eylediler. Revnak-bahş-ı mesned-i Meşîhat olan Murtezâ Efendi'nin kıyâma kudretleri olmadığından, müteşebbis-i dâmen-i ʿafv-i cemîl ve ʿözr-i müveccehi makbûl-i Şehriyâr-ı İskender-ʿadîl oldu.