Mukaddemâ deryâya Kapudan ve bahr-ı bî-pâyân-ı Hakk'a galtân olan Süleyman Paşa'nın necl-i necîbi Mehmed Beyefendi fi'l-asl ümerâ’-i deryâdan olup, âsâr-ı istihkāk nâsıye-i hâlinde be-dîdâr olduğundan, bir zemân Tersâne Kethudâlığı'nda istihdâm ve baʿdehû Derya Kapudanlığı inzımâmiyle dâhil-i dâyire-i Mîr-i mîrân-ı kirâm olmuşidi. Vezâret'e liyâkati tavr u hareketinden maʿlûm ve umûr-i Donanma-yı hümâyûn'da ibrâz-ı me'âsir-i cemîle eyleyeceği mebâdî-yi hâlinden meczûm olduğundan, hakkında nazar-ı ʿâtıfet-i Cihânbânî erzânî kılınup, şehr-i mezkûrun yirmi ikinci hamîs günü kapuya da'vet ve menkib-i istihkākına ilbâs-ı ferve-i Vezâret kılınup, iki günden sonra yâverî’-i nesîm-i Tevfik ile Donanma-yı hümâyûnu alup, Ak-deniz'e doğru bâdbân-güşây-ı ʿazîmet oldu. Müşârun ileyh sâbıkā Sadr-ı aʿzam ve câme-i vücûd-i bihbûdu tırâz-ı melekiyyet ile muʿallem olan zât-ı mükerrem olup, el-yevm çeşme-sâr-ı hayâtdan mütereşşif-i zülâl-i zindegânî ve harmen-i ʿömr-i ʿazîzden dâne çîn-i kısmet-i Rabbânî'dir.