Anadolu Pâyesi olan ʻOsmân Paşa-zâde ʻİzzet Bey'in bu defʿa dahi kevkeb-i nühüfte-ziyây-ı bahtı dirahşân ve mazhar-ı lutf-i Şehriyâr-ı zemân olup, akrân u emsâline tekaddüm ve Muharremü'l-harâmın yirminci günü Rumeli Pâyesi'yle kesb-i esbâb-ı teʿazzüm eyledi. İmâm-ı Evvel-i Sultânî olan Dervîş Efendi'nin kıdem-i tarîkı olmak haysiyyeti ile bu tafra-i nâgeh-zuhûrdan izhâr-ı teʾessür ve hakkında merhamet-i Şâhâne erzânî buyurulmak bâbında eşk-rîz-i [V 120a] teʾeffüf ü tehassür olmağla, niyâzı karîn-i müsâʿade-i Şehriyâr-ı bendenüvâz ve müşârun ileyh dahi [Ü4 261a] mukaddem târîh ile Rumeli Pâyesi'n ihrâz ve bu ʿârife-i hâtır-sâzî ile tahsîl-i dest-mâye-i imtiyâz eyledi. Yevm-i mezkûr -ki Rikâb günü idi- sadr-ı ʿâlî-makām ve Şeyhulislâm hazerâtı Dârü's-saʿâdeti'ş-şerîfe Ağası hazretlerinin meclisinde vakfe-gîr-i istirâhat iken, İmâm-ı Sânî, kadd-hamîde-i duʿâ-hânî ve lisân-ı hâl ile niyâz-mend-i ʿâtıfet-i Cihân-bânî olup, Âsaf-ı sütûde-elkāb, Müftî'l-enâm cenâblarına hıtâb ve şu Efendi pâyeden mahrûm olmak revâ olmadığını, işrâb eyledikde, Dârü's-saʿâde Ağası hazretleri ʿinâyet-i vâlâ, mûcib-i mahzûziyyet-i ʿâlem-i bâlâ olacağını îmâ ve mûmâ ileyhe dahi Anadolu Pâyesi recâ olunacağı zemân, sâbıkā İstanbul Kadısı ʻAli-zâde Efendi'nin cihet-i ʿilmiyye ile rüchâniyyetini Şeyhulislâm Efendi hazretleri der-meyân ve Anadolu Pâyesi'yle cezlân olunmasının ensebiyyetini ifâde vü beyân etmekle, mâddeteyn-i mezkûreteyn Silahdâr Ağa vesâtatiyle Südde-i suʿâd'a ʿarz u istîzân ve İmâm-ı Sânî, tâlî ve ʻAli-zâde, mukaddem olmak üzere ikisine dahi Anadolu pâyeleri ihsân olundu.