Hâricîler'in kutr-ı Hicâz'da tuğyânları hasebiyle tedmîr ü istîsâllerine Şâm Vâlîsi'nin kudreti dâ'ire-i istitâʿatinden bîrûn ve ʿalâ-rivâyetin müşârun ileyh ol tarafa izhâr-ı meyl ü rükûn eylediği tahkīk-ı zunûn eylediğinden gayri, mukaddemâ Şâm'dan ʿazl olunup, itâʿat-i emr-i ʿâlî etmediği, isâ'eti kulûb-ı evliyây-ı devletde muzmerr ve fîmâ-baʿd o taraflarda vücûdu mûcib-i hatar olacağı mukarrer olduğundan ʿazli karâr-gîr ve Eyâlet-i Şâm Vezîr Cezzâr Ahmed Paşa'ya münhasır olduğu maʿlûm-i sagîr u kebîr olmuşidi. Bâdî-yi emrde Şâm tarafına tevcîh olunduğu takdîrde mazbût olan tavr u reftârına nazaran ʿadem-i kabûl ve yâhûd devlete bir emr-i ʿazîm tahmîl eyleyeceği meczûm-ı erbâb-ı ʿukūl ve Eyâlet-i Şâm'ı kendüsine istetmek sûreti ilkā ve bu keyfiyyetler istimzâc olunarak, lâzım gelan re'y ü tedbîr tarafından istiksâ olunmak zemîninde karîha-i sabîhadan hatt-ı hümâyûn ısdâr ve Hasekî maʿrifetiyle savb-ı müşârun ileyhe tesyâr olunmuşidi. Müşârun ileyh maslahat-ı mezkûreyi tehvîn ü teshîl ve her hâlde rızây-ı yümn-iktizây-ı Şâhâne'yi tahsîl eyleyeceğini tahrîrâtında tafsîl edüp, Mısır ve Şâm, tarafına tevcîh ü ihsân olundukda, Mısır'ın nizâmı ve Hâricîler'in inʿidâmı husûsuna mübâşeret eyleyeceğini beyân ve Mısır'dan şimdilik nazarı katʿ ile Şâm ve tevâbiʿinin tevcîhine irâde-i sâmiye cereyân eylediği tekrâr tarafına inhâ ve müşârun ileyh izhâr-ı sûret-i tavʿ u rızâ ve hattâ Mısır'ın nizâmı vakti geçüp, bu defʿa ʿadem-i tevcîhini istidʿâ eyledi. [Ü4 223a – V 94a] Binâ-berîn Şâm ve Trablus eyâletleri ve Kudüs ve Nablus sancakları işbu Recebü'l-ferd evâyilinde müşârun ileyhe tevcîh ü ihsân ve Hicâz Serʿaskerliği'yle refîʿü'ş-şân kılınup, iktizâ eden teşrîfât-ı meserret-iştimâl, Dergâh-ı ʿâlî kapucu-başılarından Mehmed Ağa maʿrifetiyle savb-ı müşârun ileyhe irsâl olundu.