Mahmiyye-i Mısır [Ü4 161b] Hazînesi'nen icmâl-i muhâsebâtını zabt ve vâridât u mesârıfâtını iʿmâl-i fikr-i dûrbîn ile vâreste-i fesâd u habt edüp, umûr-ı evkāfa kemâl-i dikkat ile nezâret ve bu mâddeyi dahi tetâvül-i eyâdî-yi yağmâ-gerândan vikāyet etmek üzere dirâyet-mend ü hûşyâr bir şahs-ı mücerrebü'l-etvârın Mısır Defterdârı maʿiyyetine taʿyîn olunması, mûcibât-ı maslahatdan olduğuna binâ'en, müderrisîn-i kirâmdan olup, mukaddemâ Ordu-yi hümâyûn Kadısı'na niyâbet ile mâhiyyeti ma'lûm-i Sadr-ı Felâtûn-menzilet olan Râmiz ʿAbdullah Efendi, tarîk-ı tavîlü'z-zeyl-i tedrîsden ihrâc ile silsile-i hâcegâna ilhâk ve umûr-ı mezkûre ʿuhde-i sadâkatine ilsâk olunduğundan başka, umerây-ı Mısır mâddesine dâyir baʿzı vesâyâ kûze-i hâfızasına îdâʿ ve evvelâ İskenderiyye'ye çıkup, İngiliz Cenerali'ne taʿlîmâtını ifâde vü ismâʿ ve mahsûl müzârekâtını Der-i devlet-medâr'a ber-vech-i işbâʿ tahrîr ü inhâdan sonra maksûdun bizzât olan hidmetini edâ etmek şartıyla taraf-ı mîrîden harc-ı râhı iʿtâ ve birkaç gün zarfında Mısır'a doğru sükkân-ı ʿazîmeti irhâ olundu.