Fâyidesi mahallinde mezkûr olarak mukaddemâ Üsküdâr'da bir enbâr binâ ve derûnuna zehâyir imlâ olunmuşidi. Tersâne tarafında olan zahîre enbârlarının baʿzısı havz-ı kebîr sâhasına lüzûmu olduğundan, iddihâr-ı zehâyire min-ciheti'l-mekân müzâyaka terettüb edüp, teshîlen li-erzâkı'l-ʿibâd, Hubûbât Nâzırı olan Ahmed ʿÂtıf Efendi nezâretiyle Üsküdâr'da bir enbâr dahi bünyâd olunmak murâd olunmuşidi. Efendi-yi mûmâ ileyh bi-hasebi'l-iktizâ Sadrıaʿzam Kethudâsı nasb olunduysa dahi, mukaddemâ emr-i bînâya mübâşereti hasebiyle zikr olunan enbârın itmâmı ʿuhde-i himmetine tahmîl ve saʿy-i cemîl ile bu esnâda tekmîl olunduğundan başka, mukaddemâ inşâ [Ü4 151b – V 22b] olunan enbâr gibi bu dahi üç yük zahîre ihâta etmek üzere tahmin olunmuşiken, baʿde'l-ikmâl dört yük yirmi bin kîle zahîre teşhînine mütehammil olduğu, mahmûlü olduğu erzâk-ı ʿibâdın feyz u bereketine delâlet etdiği zâhirdir. Enbâr-ı mezkûrun inşâsına târîhler ʿarz u takdîm ve Sürûrî'nin târîhi pesendîde olduğundan, bu mahalle terkīm olundu: