Sâbıkā Hazîne Kethudâsı ve el-yevm Galata Kadısı olan el-Hâc Halîl Efendi'ye baʿde'l-ʿazl mutasarrıf olmak üzere Mekke Pâyesi ihsân olunmuşidi. Bu sene-i mübârekede hacca ʿazîmet ve bu esnâda kâfile-i hâcc ile ʿavdet edüp, hidemât-ı sâbıkası taraf-ı hümâyûndan tezkâr ve bir nev' iltifât ile nâyil-i mesârr olması bâbında hatt-ı hümâyûn ısdâr olunduğuna binâʾen, on yedi senesi Muharrem'i gurresinden pâyesine iʿtibâr ile nazar-ı ʿâtıfete sezâvâr görüldü. Mudanyalı-zâde es-Seyyid Mehmed Şemseddîn Efendi iki yüz on sekiz senesi Muharrem'inden zabt ile Galata'ya Kadı nasb ü taʿyîn ve Kudüs Pâyesi'yle ʿunvân-ı behceti tezyîn olunup, Havâss-ı refîʿa Kazâsı dahi sâl-i mezkûr Muharrem'inden “Nâlî Kayını” demekle meşhûr olan es-Seyyid Mehmed [Ü4 151a – V 22a] Efendi'ye ihsân ve Edirne Kazâsı, sâbıkā Kudüs Kadısı Hasan Paşa-zâde Hüseyin Bey'e on sekiz senesi Rebîʿulevvel'i gurresinden ve Burusa Kazâsı, Üsküdârdan maʿzûl Şerîf-zâde hafîdi Hâfız Mehmed Efendi'ye on sekiz Muharrem'i gurresinden zabt etmek şartıyla tevcîh ü ihsân ve Cumâdelâhıre'de yedlerine iʿtây-ı emr-i celîlü'ş-şân kılındı.