Sâbıkā Eflâk Voyvodası Mihal'den sudûr eden telâş u ıztırâb ve o vesîle ile ehâlîye ʿârız olan pîç ü tâb, Rûsiyyelü'ye ser-rişte-i su'âl ü cevâb olup, birkaç defʿa Re'îsülküttâb Efendi ile Rûsiyye Elçisi ʿakd-i meclis-i mükâleme ve Memleketeyn ehâlîsi hakkında beyne'd-devleteyn müstekarr olan ahdin îfâsiyçün hayli mübâhase vü mücâdele olunduğundan fazla, Rûsiyye İmperatoru dahi bu mâddeyi serd ü beyân ile ʿatebe-i felek- mertebe-i Şâhâne'ye ʿarz-ı kabâle eyleyüp, bundan garazları dahi hem-civâr oldukları memleket-i Pâdişâhî'nin âsûde vü istısfâsı olup, tahtında garaz-ı âhar ve kasd-ı dîger olmadığını ifade etmişler idi. Cemîʿ devletlerde iktizây-ı hâl ile zuhûr eden ʿavârız-ı mülkiyye, reʿâyâsını ʿale'l-ıtlâk giriftâr-ı mihen ü meşâkk etmek umûr-ı zarûriyyeden olduğu gibi, Eflâk [V 21a] ve Boğdan [Ü4 150a] reʿâyâsına dahi baʿzı mesâlih-i Devlet-i ʿaliyye zımnında tetarruk eden tekâlîf-i cüz'iyye, indifâʿ-ı ihtilâl hasebiyle bi'l-külliyye zâyil ve fîmâ-baʿd sâye-i hemâ-vâye-i Şâhâne'de cümlesi müsterîh ü fârig-i dil olacağları bastıyla, dâhil-i ʿahid-nâme-i hümâyûn olan şurûtun ibkā vü istimrârına kemâ-fi's-sâbık riʿâyet olunacağı ve Memleketeyn'e mücerrebü'l-etvâr birer Voyvoda nasbı ile reʿâyânın refâh-ı hâl ve âsâyiş-i bâlleri tahsîl kılınacağı ifhâm ve bu mukaddimât-ı müselleme ile o taraf ilzâm olunduğundan gayri, bi'l-muhabere İpsilanti'nin oğlu bâlâda işâret olunduğu vech üzere Eflâk'a Voyvoda nasb olunmuşidi. Boğdan memleketine dahi mişvârı maʿlûm ve haysiyyeti mefhûm bir şahsın taʿyînini zarûret-i vakt îcâb eylediğine binâ'en, birkaç defʿa hidmeti tecribe olunan Kostantin Bey-zâde Aleksandra Moruzi'nin Boğdan'a Voyvoda nasb olunması tasmîm ve bâdî-yi emrde Rûsiyye Elçisi, merkūmu ʿadem-i istisvâb ile lâ-ʿale't-taʿyîn dîgerini sevk u takdîm etmişiken, Re'îsülküttâb Efendi tarafından baʿzı ecvibe-i müskite ile ilâne ve defʿ-i ʿözr ü behâne kılınup, işbu Cumâdelâhıre'nin dördüncü Cumʿaertesi günü mersûm Aleksandra kapuya ihzâr ve Boğdan Voyvodası nasbı ile neşve-dâr-ı câm-ı iftihâr kılındı.