Müşârun ileyh Kapudan Süleymân Paşa'nın sulbünden bin yüz otuz senesi Zilhicce'sinin beşinci gicesi pâ-nihâde-i dâyire-i vücûd ve pertev-pâş-ı ʿâlem-i şühûd olup, teraʿruʿ-ı eyyâm-ı civânî ve fâtiha-i eyyâm-ı zindegânîsinde meslek-i peder-i vâlâ-güheri ihtiyâr ve ümerây-ı deryâya iltihâk ile kesb-i iʿtibâr etmişidi. Bir zemân murûrunda Tersâne Kethudâlığı'yla benâm ve baʿdehû Deryâ Kapudanlığı inzımâmıyla dâhil-i katâr-ı Mîr-i mîrân-ı kirâm olup, tavr u hareketinden mehâyil-i rüşdü reviyyet istidlâl ve Vezâret'e ehliyyeti nezd-i ferd-i Hâkān-ı zemânede zâhir-i hâl olduğundan, altmış altı senesi Cumâdelâhıre'sinin [Ü3 198b] yirmi ikinci Hamîs günü Rütbe-i vâlâ-yı Vezâret'le dâğzen-i kulûb-ı emsâl olup, ba'de'l-'azl ba'zı eyâlât ve elviyeye Vâlî ve seksan iki seferinde Kāyim-makāmlık ile kadri ʿâlî olmuşidi. Beş-altı sene kadar Kāyim-makāmlık mesnedinde pâ-ber-cây-ı merkez-i istikrâr ve 'âdet-i asliyyesi üzere vukūʿ [Ü4 120b] bulan şu'ûnât-ı Devlet-i ebed-istimrâr'ı vaktinin müteneffisleri olan Râyif İsmâʿîl Paşa ve Yenişehirli ʿOsmân Paşa'ya gördürüp, kendüsi uzakdan merhabâ ve tasdîk-ı ahkâm-ı erbâb-ı ârâ eyler idi. Sultân ʿAbdülhamîd Hân hazretleri cülûsunda necm-ikbâli nühüfte-i gaym-ı küdûret ve tekrâr Kapudan ve baʿdehû ʿazl ve müsâdere-i hafiyye ile rencîde-i dest-i mazarrat olup, bundan sonra dahi eyâletlerde geşt ü güzâr ve Vidin Muhâfızı iken hatb-ı cesîm-i Serʿaskerî'den istinkâf ile tekāʿüdlük ihtiyâr eylediği bed-hâhlarına ser-rişte-i izrâr olup, kâffe-i emvâli Vidin'de muhterik olmuş iken, bu defʿa dahi baʿzı müsâderât ile üftâde-i çâh-ı mehâfat olmuşidi. Cülûs-ı meymenet-me'nûs-i hazret-i Şehriyârî'de hûrşîd-i ikbâli dirahşân ve Kandiye Vâlîsi iken iki yüz altı Ramazân'ında mühr-i hümâyûn ile fâyiku'l-akrân oldu. İki seneden ziyâde Sadr-ı devletde kâr-fermây-ı enâm ve akviyâ ve ʿuzamây-ı devlete müdârâ ile râhat-yâb-ı ʿizz ü ihtişâm olup, muktezây-ı şeyhûhet ile icrây-ı lâzime-i Sadâret'de ʿaczi hüveydâ ve baʿzı umûr-ı lâzımü'l-iʿtinâda rehâvet ve kusûr-ı zarûrîsi rû-nümâ olmağla ʿazl ve hakkında tesvîğ-i merhamet [Ü3 199a] kılınup, bilâ-müsâdere Ortaköy kurbünde vâkiʿ sâhil-hânesinde ikâmet ü îvâ olundu. O zemândan bu âna gelince duʿây-ı devâm-ı ʿömr-i Pâdişâhî'ye müştağıl ve târîh-i mezkûrda civâr-ı rahmet-i Hakk'a müntakıl oldu. ʿÖmr-i girân-mâyeden seksan altı seneyi mütenâhiz ve eyyâm-ı hayâtının ekserîsinde şâdî vü sürûr ve refâh u huzûr bâriz idi. Müşârun ileyh ʿâkıl ve pâyân-bîn ve surûf-ı rüzgârdan ʿadem-i mübâlât ile kaviyyü'l-kalb ve metîn olup, letâyife [Ü4 121a] mâyil ve idâre-i kelâm ve fıkarât-ı bedîʿü'l-insicâmda Sehbân-ı Vâ'il'e mümâsil, meʿârif-i cüzʿiyyeden hisse-mend ve bî-mâ-kasem kāniʿ u hursend, munsif ü muʿtedil bir Vezîr-i deryâ-dil idi.