Şehr-i mezkûrun on ikinci Pençşenbih günü de'b-i dîrîn-i Saltanat-ı seniyye üzere Şehriyâr-ı bedîʿü'l-âsâr dâme mâ-dâme'l-leylü ve'n-nehâr tantana-i Mülûkâne'leriyle Sultân Ahmed Câmiʿ-i şerîfi'ni teşrîf ve huzzâr-ı meclisi irâ’e-i talʿat-ı pür-behcet-i Şâhâne'leriyle isʿâd u taltîf ʿakabinde, mevlid-hânlar sebeb-i âferîniş-i ʿâlem ve bâʿis-i terkîb-i eczây-ı nevʿ-i benî âdem olan peygamberimiz Muhammedü'l-Mustafa [Ü3 148a] ʿaleyhi efdalü't-tehâyâ hazretlerinin zîb-i târik-i vücûd ve ârâyiş-i mehd-i şühûd oldukları keyfiyyâtını tilâvet ve neşr-i âsâr-ı rûhâniyyet etdikden sonra, lâzım gelenlere ilbâs-ı hilʿat olunup, muhyî-yi sünnet-i âbâ ve muhibb-i ahbâr u siyer-i enbiyâ olan Pâdişâh-ı hûrşîd-likā hazretleri intizâr-ı selâm ile [Ü4 74a] saff-beste-i kıyâm olan bendegânı kûşe-i âb-rûy-i iltifât ile vâye-dâr-ı ʿizz ü iʿtibâr ve zevrak-ı felek-revnak-ı Mülûkâne'lerine süvâr olarak, sâhil-hâne-i âsumân-nişânelerin reşk-sâz-ı sahn-ı gül-zâr eylediler.