Islâh-ı zâtü'l-beyn içün mukaddemâ taʿyîn olunan Kapu Kethudâsı Süfyân Ağa mahalline varmazdan mukaddem iʿtilâf-ı tarafeyn hâsıl olduğu îmâ olunmuşidi. Ağa-yı mûmâ ileyh, Vezîr Gürcü ʿOsmân Paşa ile mülâkātda kûze-i hâfızasına îdâʿ olunan vesâyây-ı devlet-i gerdûn-irtifâʿı bi-temâmihâ müşârun ileyhe ismâʿ eylediğinden gayri, Silistre ile Selânik Sancağı'nın mübâdelesinde dahi sûret-i müsâʿade derkâr olacağını işʿâr etmişidi. Bu sûret ʿOsmân Paşa'nın min-külli'l-vücûh tabʿına muvâfık gelüp, Silistre'ye râzî ve istiʿfây-ı ism-i mâzî edüp, ânifen çekîde-i kilk-i hakīkat-perdâz olduğu vech üzere sandûkçe-i kitmânında mahfûz olan evâmir-i ʿaliyyeyi ibrâz ve Silistre Eyâleti ve Niğbolu Sancağı'nın tevcîh ü me'mûriyyet emirlerini müşârun ileyhe iʿtâ ve Selânik Sancağı'nın tevcîh emrini Mûsâ Paşa tarafına isrâ ile me'mûriyyetini ikmâl ve ʿavdetiyçün mektûb-ı ʿâlî istihsâl eyledi.