Bir zemândan berü tarîk-ı meşîhatî şefîʿ-i mücbir ve muʿîn ü nâsır vâsıtalarıyla bilâ-imtiyâz nâ-ehl ü cühhâle münhasır olup, tarîk-ı mezkûr erbâbı ise halkı vaʿz u nasîhatla irşâd ve ʿakāyid-i dîniyye ve şerîʿat-ı Mustafaviyye'yi teblîğ ile ʿavâmm-ı nâsı varta-i dalâletden ibʿâd ve mesâlihine intihâb u intikād olundukları zâhir olup, fî-zemâninâ hâzâ o makūlenin ekserîsi sevâd-hânlık derecesinden dûn ve sanʿat-ı cerr ve fenn-i kesb-i sîm ü zer ile lâ-yaʿkıl u mecnûn olmalarıyla, sıyâneten li't-tarîk tâlib-i meşîhat [Ü4 42b] olanlar lede'l-iktizâ imtihâna havâle vü taʿlîk irâde olunup, etrâfda hall-i İlâhî zuhûruna revzene-güşây-ı çeşm-i intizâr olan meşâyıh hücûm ve ibrâz-ı dânendegî vü maʿlûm etmeleriyle, lâf ü güzâflarına iʿtibâr olunmayup, “İnde'l-imtihâni yükramü'l-mer'ü ev yühânü” mefhûmuma tebaʿiyyet ve tarîka-i enîka-i âzmudegî vü ihtibâra riʿâyet olunup, nefsine istinâdı ve ʿilmine vüsûk u iʿtimâdı olmayanlar birer birer mazîk imtihândan firâr ve meşîhat, zeyl-i vech-i muharrer üzere Şeyh-ı mûmâ ileyde karâr ve bu sebeble fîmâ-baʿd câhil ü nâdân olanlar mahrûm u nâ-kâm ve erbâb-ı kābiliyyet ü istihkāk nâyil-i merâm oldular.