Müşârun ileyh Tırnova Kasabası'na duhûl ve tehassun eden muhâlifîn ile cenge meşgûl olduğu ahbârı Pâsbân-zâde'ye vusûl hengâmında, zîr-i dest-i habâsetinde olan erâzil ü eşhâsı kasd-ı imdâd ile Tırnova'ya sevk ve müşârun ileyhi mahall-i âhara hareketden ʿavk etmişidi. "Rumeli Vâlîsi Vezîr Gürcü ʿOsmân Paşa külliyyetlü asker ile Plevne üzerine tahrîk-i livâ eyledi” deyü bir haber münteşir olup, Plevne'de mevcûd iki yüz kadar eşrâr Vezîr-i müşârun ileyh ile mukātele edemeyüp, lâ-büdd firâr edecekleri âşikâr olduğundan, Tırnova'ya giden hevâdârlarına kazıyyeyi ihbâr ve Plevne'ye lüzûm-ı rucûʿların [Ü3 109b] işʿâr etmeleriyle, eşkıyây-ı mezkûre Tırnova'yı terk ile fevc fevc Plevne semtine munsarıf ve bu keyfiyyet ehâlîye münkeşif oldukda, ehl ü ʿiyâl ve ihrâcına tâkatleri yetişen eşyâ vü emvâllerin alup, Niğbolu'ya ve andan Kulle tarafına irtihâl eyledikleri hılâlde eşkıyây-ı mezbûre kasabaya dâhil ve nehb ü gāret maslahatını itmâmdan sonra, üzerlerine gelecek asker ile mukāvemete yek-dil oldular. Haber-i mezkûrun kizb-i sarîh olduğunu eşkıyâ tashîh eylediklerinden, mahall-i mezkûru makarr ve mecmaʿ-i erbâb-ı fesâd ü şerr etmişler idi. Bu esbâb ile Tırnova etrafı gürûh-ı mekrûh-ı muhâlifînden hâlî kaldığı resîde-i semʿ-i ʿâlî olup, fîmâ-baʿd müşârun ileyh Sülova Kazâsı'nda olan eşkıyâyı taʿyîn-i asker ile tathîr ve bâ-husûs Niğbolu semtine ber-vech-i imdâd leşker tesyîr ve kendüsi bizzât Plevne'de ictimâʿ eden eşkıyâ üzerine tahrîk-i [Ü4 35b] hatevât etmek muktezayât-ı vakt ü hâlden olduğuna binâ'en, bu mazmûnu şâmil tarafına birkaç defʿa misâl-i lâzimü'l-imtisâl irsâl olunmuşidi. Butû'-ı hareket ve her menzilde bir-iki gün ikāmet ederek ne hâl ise Plevne'ye karîb mahalde ilkāy-ı raht-ı ârâm ve darb-ı evtâd-ı hıyâm etmişidi. Rumeli Vâlîsi'nin Berkofça'ya ve Belgrad Vâlîsi'nin Fethülislâm'a ta'yîn etdikleri askere ve Nişli Hâfız Ağa'ya galebe eden küştenîler dahi o aralıkda Plevne'de olan eşkıyâya iltihâk etmiş bulunmalarıyla, bu cemʿiyyetleri tekâsüf ve Vidin tarafından imdâdları dahi pey-der-pey terâdüf edüp, bu hâl ile külle yevm miyânelerinde nâr-ı harb iştiʿâl ve gâh bunlar ve gâh anlar galebe ile “el-Harbü sicâlün” maʿnâlarına intikāl olunur idi. Tirsinikli-zâde o aralıkda imdâd içün Bilâslı ordusuna gelüp, nehâran kıtâl ve leylen iki taraf [Ü3 110a] askeri bir yere gelüp, şürb ü lehve iştigāl eylediklerini muʿâyene ile şübheye düşüp, âhır-ı kâr ikāmetde hatar mülâhazasıyla geldiği tarafa rücûʿ ve Niğbolu'dan gelan imdâdcılar miyânında dahi bu haber şuyûʿ bulup, anlara dahi 'avdet vukūʿ bulduğundan gayri, 'ale't-tevâlî birkaç gün berf ü matar nüzülüyle hevâlarda şiddet ve tahte'l-hıyâm ikāmetde ʿusret görülmekle, askere fütûr gelüp, fevc fevc teferruka âgāz eyledikleri eşkıyâya ma'lûm ve işbu Cumâdelâhıre evâyilinde Plevne'den hurûc ve Bilâslı ordusuna hücûm ve ʿan-asl hey'et-i mecmûʿaları ecnâs-ı muhtelife ve eşkâl-i gayr-i mü'telifeden mürekkeb olduğuna binâ'en, berü tarafda olan asker ile ihtilât ve düşmen ve dost bilinmekden kalup, fi'l-hâl orduyu giriftâr-ı tezelzül ü ihtibât etmeleriyle, meterisleri zabt ve askeri [Ü4 36a] perîşân ve mühimmât u edevâta itâle-i dest-i husrân eylediler. Müşârun ileyh dahi cemʿ-i yesîr ile 'avdet ve Kızanlık semtine gelüp, vukūʿ bulan hâlet-i müdhişeyi o taraflarda bulunan Kapu Kethudâsı Arnabud Hasan Efendi ile Der-i devlet-medâr'a tahrîr ü işaret edüp, müşârun ileyhin butû'-ı hareketi ve ʿalâ-rivâyetin fesâd-ı niyyeti ve ru'esây-ı asker ile ʿadem-i imtizâc u ülfeti, bu hâdisenin vukūʿuna bâdî ve ber-minvâl-i muharrer mühimmât ve sâyir edevâtın giriftâr-ı eyâdî-yi eʿâdî olmasına sebeb-i ʿâdî oldu. Bu perîşânlık ile müşârun ileyhin bu hılâlde telâfî-yi mâ-fâta iktidarı meslûb ü menzûʿ ve bir maslahat görülmemiş iken, “Segbân Şehriyyesi” nâmıyla vâfir meblağ talebinde olacağı emr-i maktûʿ olup, behâr tedârükünde olmak vesîlesiyle askerini devşürüp, mansıbına ʿâzim olması istisvâb ve bu irâde-i seniyye zuʿamâdan birinin mübâşereti ile tarafına tahrîr ü işrâb olundu.