Vezîr-i müşârun ileyh me'mûr-ı maʿiyyeti olan asâkir ile Edirne'ye pâ-nihâde-i vusûl [Ü4 33b] ve balkānın berü tarafında tehaşşüd eden haşerâtın tedmîr ü istîsâlleri tedâbîrine meşgül iken, ru'esây-ı eşkıyâdan “Ciğerci-oğlu” ve “ʿÎsâ-oğlu” nâmân küştenîler vâfir dağlu eşkıyasıyla ilgār ve Edirne'ye beş sâʿat mesâfede vâkiʿ Segbân Karyesi'ne ilkāy-ı raht-ı idbâr [Ü3 108a] ile ikdâm ve cesâretlerin izhâr eyledikleri müşârun ileyhe ihbâr olundukda, maʿiyyetinde olan mevcûd asâkirden mikdâr-ı kifâye asker ifrâz ve Edirne askerine zamm ile Edirne Bostancı-başısı'nı bu cemʿiyyete Sergerde nasb edüp, ʿalem-i ʿazîmetlerine ihtizâz vermişidi. Asâkir-i me'mûre mecmaʿ-i ehl-i şekā olan karye-i mezbûreye resâ olduklarında, fi'l-hâl işʿâl-i nâyire-i müşâcere ve eşkıyâyı her tarafdan muhâsara eyleyerek, karye-i mezbûrenin ekser mevâzıʿını zabt ile kûşe-be-kûşe rekz-i aʿlâm ve cümlesini tuʿme-i şemşîr-i intikām eyleyecekleri hengâmda nâ-gâh cevv-i semâ gayheb-i gaym ile müşâbih-i leyle-i zalmâ olup, tegerg ile muhtelit bârân-ı firâvân mütesâkıt ve rîh-i ʿakīm misillü rûzgâr hübûtuyla nevʿ-i insân ve cins-i hayvân bî-tâb ü tüvân olduklarından gayri, hafr olunan meterisler cedâvil ve enhâra muʿâdil ve bu hâl ile meydân-ı muhârebede temekkün ü istikrâr gayr-i kābil olup, maʿiyyetinde bulunan Edirne Aʿyânı Kara Ahmed'in dahi dağlular ile ittifâk-ı nihânîsi miyâne-i askerde meşhûr ve saʿy ü ikdâm-ı leşkeriyâna bâʿis-i rehâvet ü fütûr olup, zarûrî ʿavdet ve mahall-i maʿreke kurbünde ikāmet eyledikleri haberi müşârun ileyhe vâsıl olduğu sâʿat Kethudâsı'nı bir-iki bin âdem ile taʿyîn edüp, perîşân olan askeri cemʿ ve tekrâr eşkıyâ ile ahşâma dek ceng ve hücûm-ı zalâm-ı şâm sebebi ile vakit teng olduğundan asker girü çekilüp, [Ü4 34a] yarım sâʿat yerde vâkiʿ bir karyede sabâha intizâren ikāmet eyledikleri eşkıyâya ʿıyân ve istîsâl ü taʿkīblerinden keff-i yed olunmayacağı müstebân olduğundan, gice sâʿat beşde mürdelerini sûhte-i şuʿle-i nâr eyleyerek firâr ve bu maʿrekede müteʿayyinlerinden Ciğerci-oğlu ve elli altmış kadar rufekāsı dereke-i cahîme karâr eyledikleri münhiyân-ı [Ü3 108b] ahbâr takrîriyle zâhir ü âşikâr oldu. Edirne Aʿyânı Kara Ahmed fi'l-asl fukarâyı mübtelây-ı sıklet-i teklîf ve umûr-ı mühimme zımnında sâdır olan evâmir-i ʿaliyyeyi tahfîf edegeldiğinden başka, bu defʿa vukūʿ bulan muhârebede hıyânet ü ihâneti semʿ-i eşref-i Husrevâne'ye resîde ve sırran Vezîr-i müşârun ileyhe hitâben sâdır olan hatt-ı hümâyûn mûcebince ser-i nuhûset-eseri bürîde kılınup, Edirne Bostancı-başısı'nın dahi istîsâl-i ehl-i bağy ü dalâlde rehâveti maʿlûm ve Edirne Aʿyânı mâddesinde bi'l-külliyye emniyyeti münselib olup, fîmâ-baʿd bu hâl ile hidmete yaramayacağı meczûm olduğundan, ʿazli beyyinü'l-lüzûm olduğu Vezîr-i müşârun ileyh tarafından îmâ ve maʿiyyetinde olan hasekîlerden Akbaş-zâde Hüseyin Ağa'ya bu hıdmet istidʿâ olunduğuna binâʾen, şeref-yâfte-i sudûr olan hatt-ı hümâyûn mûcebince mûmâ ileyh maʿzûl ve Edirne Bostancı-başılığı ile Hüseyin Ağa nâyil-i eʿazz-i meʾmûl olup, selefi dahi Edirne'de yâhûd çiftliğinde ikāmet ve yâhûd Ordu-yi hümâyûn'a ʿazîmet ile tahyîr ve bu mazmûnda tarafına emr-nâme tahrîr olundu. Bilaslı Mehmed Paşa'nın ʿuhdesinde olan Çirmen Sancağı dağlı eşkıyâsı meʾmûriyyetine mebnîyen tarafına tevcîh olunmuş idi. Müşârun ileyhin o hıdmetden infikâk [Ü4 34b] u müfârakatı ve mansıbı tarafına gitmek meʾmûriyyeti, livâʾ-i mezkûrun refʿini îcâb ve bu hıdmete meʾmûr bulunanlara tefvîz olunmasını kâr-şinâsân-ı devlet istısvâb eylediklerine binâʾen, livâʾ-i mezkûr işbu Recebü'l-ferd evâyilinde dağlı eşkıyâsına meʾmûr Trabzon Vâlîsi Vezîr-i müşârun ileyhe ilhâk ve râbıta-i meʾmûriyyeti ihkâm u îsâk kılındı. Edirne Muhâfızı olan Vezîr Ağa Hasan Paşa'nın fîmâ-baʿd Edirne'de ikāmeti Tayyâr Paşa ile münâfeseyi müstelzim ve bir münâsib mahalle meʾmûriyyeti mühimm [Ü3 109a] olduğundan, Şumnu'ya varup, Deliorman halkını cemʿ ve tahsîl-i esbâb-ı mukāvemet ve lede'l-iktizâ bir mahalle meʾmûriyyetinde vücûd-i kesret ile teşmîr-i sâk-ı gayret etmek mülâhazasıyla Edirne'den hareket ve Şumnu'ya doğru ʿazîmet eylemesi bâbında tarafına hitâben eğerçi ısdâr-ı emr-i celîlü'l-mikdâr kılınmışidi. Ancak bu esnâda Varna muhâfazasında bir Vezîr'in vücûdu muktezayât-ı vakt ü hâlden olduğuna binâʾen, müşârun ileyhin meʾmûriyyet-i ûlâsı sarf ve zimâm-ı ʿazîmeti Varna muhâfazasına ʿatf olundu ise dahi, Pâsbân-oğlu, Kalafat tarafından Eflâk'a bir mikdâr eşhâs imrâr ve Kırayova semtine ʿazîmetleri ihbâr olunup, defʿ-i mekîdetlerine tertîb olunan askere Başbûğ olmak üzere me'mûriyyeti Eflâk cânibine tahvîl ve on bin guruş ʿatıyye-i hümâyûn ile hareketi taʿcîl olundu.