Bosna Vâlîsi Vânî Mehmed Paşa'dan tamaʿa dâir zuhûr eden tavr-ı bü'l-ʿaceb, ihtilâl-i memlekete sebeb ve ʿazli müstehab olduğuna binâ'en, şehr-i mezkûrun yirmi yedinci Sebt günü müşârun ileyh ʿazl ve Bender muhâfazasına me'mûr ve Bosna Eyâleti ile Eğriboz Muhâfızı olan Vezîr Hakkı Mehmed Paşa mesrûr olup, Hotin Muhâfızı Vezîr Yûsuf Paşa'nın dahi ilhâka ihtiyâcı mukarrer olmağla, münhall olan Eğriboz Sancağı kemâ-kân hıdmet-i muhâfazada olmak şartıyla tarafına tevcîh ü ihsân ve Bender Muhâfızı Vezîr Ahmed Paşa'ya dahi hall-i İlâhî zuhûrunda bir mansıb ʿinâyet olunacağı tazammunuyla ısdâr-ı emr-i ʿâlî-şân olundu. Vânî Mehmed Paşa'nın bâlâda zikr olunduğu vech üzere hırs u tamaʿı yevmen-fe-yevmen mütezâyid ü mevfûr ve giderek tevlîd-i fitne vü şûr edüp, ehâlî-yi Bosna ictimâʿ ile indifâʿ-ı mezâlimi niyâz eylediklerinde, Kethudâ'sını cemʿiyyete irsâl ve aglâz-ı kelâm ile keşf-i celiyye-i hâl eyledikde, sebük-serân-ı ehâlî envâʿ-ı şütûm ile Kethudây-ı mezbûr üzerine hücûm eylediklerinden, mekşûfü'r-re's firâr ve kazıyyeyi Paşa'sına işʿâr edüp: "Travnik'de mukīm Mîr-i mîrân'dan Süleymân Paşa bu fitne hudûsüne ʿillet oldu” deyü tevehhüm olunmağla, istifsâr-ı sebeb-i cemʿiyyet ve istişâre-i umûr-ı memleket behânesiyle Paşa-yı mûmâ ileyh Serây'a daʿvet olunup, geldiği gibi şemşîr-i gadra [Ü4 32a] ʿalef ve o mazlûm u bî-günâhı telef ile hânumânını vîrân ve dûdmânını mübtelây-ı enîn ü figān [Ü3 106b] eyleyüp, bu tehevvür ü gazab ehâlînin bir kat dahi ʿadâvet ü buğzuna sebeb olup, ʿâdetleri üzere serhadlere irsâl-i haber ve müşârun ileyhe îsâl-i zarar mukarrer iken, bu keyfiyyete vukūfdan mukaddem vukūʿ-ı ʿazli mahz-ı isâbet ve belki ʿayn-i kerâmet olduğu zâhirdir.