Mîr-i mûmâ ileyh Ohrili Vezîr Ahmed Paşa'nın birâderi olup, ocağlarından niçe nâmdâr vezîrler ve mîr-i mîrânlar zuhûr edüp, melâhim ü gazavâtda yararlıkları ve uğur-ı devletde behâdarlıkları mütevâtir ü meşhûr olduğundan, her bâr Devlet-i ʿaliyye tarafından manzûr olagelmişler idi. Birâderi Ahmed Paşa Varna Vakʿası'nda Rüstemâne ceng ve Moskovlu'yu berhem-zede-i dâne-i top u tüfeng edüp, bilâhare Hotin Muhâfızı iken firârî Boğdan Beyi'nin nifâkıyla o Gāzî Vezîr küşte-i şemşîr-i gadr u tezvîr olup, mîr-i mûmâ ileyh dahi Devlet-i ʿaliyye'nin mücerreb hıdmet-kâr-ı sadâkat-kârı olup, bir zemân Mîr-i mîrânlık ile imrâr-ı subh u leyâl ve birkaç seneden sonra Beylerbeyiliği, Kapucu-başılığa ibdâl edüp, baʿzı hıdemâtda istihdâm olunarak Mısır'a me'mûr, kılâʿ askerine Başbûğ nasb olunup, ber-minvâl-i muharrer Leymeson Vakʿası'nda kazā'en mecrûh ve o vakitden bu âna gelince cerhi iltiyâm kabûl etmeyüp, âbâ vü ecdâdının ekseri gibi râh-ı [Ü4 31b] devletde fedây-ı rûh eyledi.