Üsküdar'da [Ü4 17b] Mûm-hâne kurbünde vâkiʿ Yehûd-hâne'den bir-iki gün mukaddem âteş zuhûr edüp, imdâd-ı Rabbü'l-ʿibâd ile karîn-i inhımâd olmuşiken, şehr-i Rebîʿulâhır'ın sekizinci Cumʿa gicesi sâʿat yarımda iken mahall-i mezkûra karîb sâbık Bostancı-başı ʿAlî Bey'in sâhilinden âteş zâhir ve fi'l-hâl meʾmûrlar itfâsına mübâşir olup, yalnız sâhil-i mezkûr sûzân ve baʿzı menâzil üzerinde hıdmet-i itfâ ile meşgûl olanlardan birkaç kimsede âsâr-ı şikestegî-yi aʿzâ nümâyân olup, sâhib-i sâhilin ʿan-asl hücûm-ı fakr u imlâk ile hâli muztarr ve esâs-ı beyt ve emvâli bu defʿa ihtirâk ile hâkister olduğundan, müstehakk-ı ʿâtıfet-i Pâdişâh-ı kerem-ver olmağla, binâ-berîn taraf-ı hümâyûndan beş bin ve ʿismetlü Vâlide Sultân hazretleri tarafından beş bin, cemʿan on bin guruş ʿatıyye ile cihet-i umûru tehvîn ve lehîb-i derûnu teskîn kılındı.