Altmış Dört Cemâʿati'nden Galata'da kahvecilik hirfetinde olan "Deli ʿAlî" nâm kimesne galebe-i ahlât-ı sevdâviyye ile baʿzı nâ-bercâ harekete ictirâ eylediğinden, mukaddemâ birkaç defʿa Dâru'ş-şifâ'ya vazʿ u ilkā olunmuşidi. Birer takrîb tahlîs-ı girîbân ve bu defʿa tâbiʿ nâmıyla [Ü4 14a] hidmetinde dâmen-der-meyân olan bir âdemi katl eylediği, mesâmiʿ-i evliyây-ı devlete resîde, tûmâr-ı ʿömrü kısâsan never-dîde kılınmak irâdesine mebnî ihzârına zâbitler taʿyîn ve gâh kalyonculuk ve gâh yeniçerilik iddiʿâsında olup, tarafeyn zâbitlerine ʿadem-i itâʿatle izhâr-ı kîn eylediğinden başka, kahvesine tehassun ve birkaç tüfeng ve vâfir barut cemʿiyle müceddeden tecennün edüp, sühûletle indifâʿı matlûb olduğundan, bir semte ʿazîmeti telmîh olunmuşidi. Bu ruhsat zevâl-i vücûduna ʿillet olacağını iʿtikād ile firâr ve gaybetden ihtirâz ve kemâ-kân zirve-i bağy ü şikākda pervâz eyleyüp, bilâhare sebîli küşâd ve rişte-i ʿömrü vakt-i merhûnuna imtidâd olunmuşidi. Kayd-ı hasrdan vâreste olduğu gibi bilâ-sebeb bir şahsı dahi katl ile tekrâr kahvesine tehassun eylediği ihbâr ve bi-eyyi-hâl [Ü3 89b] ahz u istîsâliyçün lâzım gelenlere emr-i ʿâlî ısdâr olunup, kahvesi muhâsara ve şakī-yi merkūm birkaç sâʿat tüfeng ve sâyir esliha ile müşâcere edüp, sühûletle istîsâlinden zâbitân me'yûs olduklarına binâ'en, kahvesi leylen lağım ile ber-hevâ kılınup, tahte'l-cidâr hayyen ve mecrûhan ele geçüp, fi'l-hâl cezâsı tertîb ve misli gayr-i mesbûk bir keyfiyyet-i garîbe olduğundan, cerîde-i vekāyiʿa sebti tasvîb olundu.