Ordu-yi hümâyûn hareket etmezden mukaddem bi'l-fiʿl Yeniçeri Ağası nasb olunan ʿÖmer Ağa'dan her vechile sadâkat u ʿiffet ve rûz-i mesâffda şecâʿat ü metânet me'mûl iken, hîn-i hareketinde [Ü4 2b] ve hılâl-i râhda [Ü3 78b] bayrak küşâdı behânesiyle kati çok kimesneler tecrîm ve Ordu-yi hümâyûn'da mevcûd yeniçeriye taksîm içün bahş u inʿâm olunan postal-behâyı nefsine tahsîs u tanzîm eylediğinden gayri, hîn-i muhârebede izhâr-ı cübn ü bed-dilî ve ʿillet-i tefrîkanın medâr u mahmili olmağla, beyne'l-asâkir heybet ü vekārı münkesir ve bu sebeble Ocak-ı ʿâmire ahkâm u âdâbını tenfîze gayr-i muktedir olup, bekāsı muzırr ve ʿazli zamîr-i Sadr-ı müşterî-tedbîr'de müstetir olmuşidi. Ordu-yi hümâyûn ʿavdetinde mûmâ ileyh ʿazl ve iki tûğ ile ʿArîş muhâfazasına nakl olunup, Zağarcı-başı olan Ahmed Ağa defʿaten Ağa nasbı ile dil-şâd ve Ocak-ı ʿâmire turnacılarından olup, me'mûr olduğu hidmetlerde cesâreti meşhûd olan Kāsım Ağa, Zağarcıbaşılık ile ber-murâd oldu.