Müstağrak-ı deryây-ı rahmet-i Sübhân, Sultân Ahmed Hân Câmiʿ-i şerîfi revâkında nesc ü i'mâl olunan kisve-i Beytü'l-harâm ve pûşîde-i vâcibü'l-ihtirâm bu defʿa dahi resîde-i hayyiz-i hıtâm olup, gāyet-i edeb ü huzûʿ ve nihâyet-i hürmet ü huşûʿ ile Enderûn-ı hümâyûn'a nakli irâde olunup, işbu Cumâdelâhıre'nin selhı Pençşenbih günü nâmları mukayyed-i Defter-i Teşrîfât olan zevât, câmiʿ-i mezkûr sâhasında ictimâʿ edüp, Kisve-i şerîfeyi bağllara tahmîl ʿakabinde tavr-ı mergūb ve hüsn-ı üslûb üzere tertîb-i âlây-ı dilârâ kılınup, meşy-i hafîf ile hareket ve Enderûn-ı hümâyûn'da vâkiʿ [Ü1 251b] Harem ağalarına mahsûs câmiʿ-ı şerîfe vazʿ u îdâ ile tekmîl-i hıdmet eylediler. Kisve-i şerîfe hıdmetinde târupûd-ı ihlâs ile nesc-i perend-i sadâkat edenlere iltifât-ı şîme-i mürüvvet muktezayâtından olduğuna binâʾen, hemân o meclis-i hatîrde Dâru's-saʿâde Ağası Yazıcısı'na ve Nâzırı'na birer sevb bol yenlü [Ü3 46b] kürk ve bazılarına hilʿatler iksâ ve ferdâsı huzûr-ı Kāyim-makāmî'de dahi bu muʿâmele-i hasene icrâsıyla tekrîr-i iltifâta iʿtinâ olundu.