Şâm Vâlîsi ve Mısır Serʿaskeri olan Vezîr İbrâhîm Paşa'nın hatb-ı cesîm-i Serʿaskerî'ye müteferriʿ olan umûrda zâhir olan rehâvet ü kusûru teʾhîr-i maslahat ve ifâte-i vakti müstelzim olduğundan gayri, müşârun ileyhin Serʿaskerlik'i Cezzâr Paşa tarafından tasvîb olunmayıp, mesâvî vü kabâyihini tezkîr ve insırâf-ı [Ü2 209a] meʾmûriyyetini îmâ vü tahrîr eylediğine binâʾen, o havâlîde Serʿaskerlik idaresi Cezzâr Paşa'ya münhasır gibi görülmekle, Emâret-i Hâcc ile Mısır Serʿaskerliği şehr-i mezkûrun on yedinci günü Vezîr-i müşârun ileyhe tevcîh ve serâsere dûhte bir aʿlâ semmûr kürk ve bir kabza mücevher pala ve mücevher bir çift piştov ile kadr ü şânı terfîʿ ü tenvîh olunup, bâlâsı hatt-ı hümâyûn ile müveşşah fermân-ı ʿâlî-şân ve teşrîfât-ı mezkûre ile Mîrâhûr-ı Evvel Zühdî İsmâʿîl Beyefendi o tarafa isrâ ve Tırhala Mutasarrıfı Vezîr Mustafa Paşa maʿiyyetine me'mûr sunûf-ı asâkir ile bi'l-muhâbere İskenderiyye'ye çıkup, iki tarafdan tazyîk-i aʿdâ ve tahlîs-i Ümm-i dünyâ etmeleri tenbîh ü îsâ olundu. [Ü1 193a]