Beher sâl pûşîde-i Mekke-i mükerreme, Mısr-ı Kāhire'den taʿyîn olunan mâl ile nefs-i Mısır'da nesc ü iʿmâl ve ol bukʿa-i mübârekeye baʿs ü irsâl olunur idi. İstîlây-ı nîreng-i Frenk ile o tarafda pûşîde nesci şimdilik ber-taraf olup, Âsitâne'de iʿmâline irâde-i hümâyûn şeref-sudûr ve ʿArabacılar Kâtibi Seyyid Nâyilî Efendi me'mûr olup, ihzâr-ı nessâc ü ʿummâl ve Sultân Ahmed Câmiʿi hâricinde olan revâk-ı Mehter-hâne'den meclûb sitâre ve zikāk ile te'sîr-i mihr-i münîr ve gulû-yi bernâ vü pîrden setr olunarak nescine iştigāl olunup, târ-u-pûdu harîr-i siyâhdan mensûc ve her kıtʿasının tûlü yirmi dört ve ʿarzı birer zirâʿ ve birer rubʿ olmak üzere Mekke-i mükerreme içün altmış dört kıtʿa ve Makām-ı İbrâhîm'e taʿlîk içün zerendûd iki kıtʿa pûşîdeden başka, menâsik-i haccı müşʿir ve evsâf-ı Kaʿbe-i ʿulyâ'yı muhbir hatt-ı celî ile baʿzı [Ü2 208b] âyât-ı Furkâniyye resm olunup, Beyt-i şerîf'in miyânına bend içün aʿlâ sırmadan maʿmûl seksan bir zirâʿ hizâmât ve Bâb-ı mağfiret-meʾâb-ı Beyt-i şerîf'e taʿlîk içün tekellüf ve san'atı bedîdâr bir perde-i zer-târ pîrâye-bahş-ı dest-gâh-ı nizâm ve harîr ve sırma ve sâyir eczây-ı pûşîde-i şerîfeye yirmi altı bin dokuz yüz seksan sekiz guruş sarf olunduğundan başka, dest-gâh ve sâyir levâzım içün dört bin dört yüz seksan bir buçuk guruş bezl olunup, cemʿan otuz dört bin dört yüz altmış dokuz buçuk guruş mesârıfla resîde-i hayyiz-i hüsn-i hıtâm olmağla, [Ü1 192b] işbu Recebü'l-ferdin on birinci Çehârşenbih günü Dâru's-saʿâde ve Bâbü's-saʿâde ağaları ve Rikâb-ı hümâyûn ağalarıyla Haremeyn Takımı ve Kapucu-başı ağalar ve zuʿamâ ve çavuşân, Sultân Ahmed Câmiʿi'nde hâzır olup, duʿâ ve tehlîl ile pûşîdeler sanduklara vazʿ ve Serây-ı hümâyûn'a nakl ve ferdâsı Pençşenbih günü Surre-i hümâyûn ve pûşîde Surre Emîni olan Memiş Efendi'ye huzûr-ı hümâyûnda teslîm olunup, Emîn-i mûmâ ileyh alay ile Üsküdâr'a güzâr eyledi.