Zikr olunan ocağların sâyir ocağlar gibi meʿâş ve yevmiyyeleri mevâcib tertîbine idhâl ile Kubbe-altı'nda verilmek tezâyüd-i şevk u rağbetlerine sebeb olacağını nâtık nâzırları Firdevsî Efendi [Ü2 201a] Bâb-ı ʿâlî'ye takrîr irsâl eyleyüp, Rikâb-ı hümâyûn'a ʿarz olundukda, ruhsat-ı Cihân-bânî erzânî ve ihrâc olunacak işbu bu Muharrem mevâcibinden bed' ile ocağlarının Kâtib ve çavuşları Kubbe-altı'nda mevâciblerini ahz edüp, Nâzır ve ağaların meʿâşları ve revgan-ı zeyt akçası, Topçu ve ʿArabacı misillü mevâcib ʿakabinde Hazîne-i ʿâmire'den Veznedâr-başı Ağa'dan alınup, sâyir ocağlar ile bunların dahi icmâlleri tertîb ü takdîm olunmak ve zikr olunan ocağlara tulumba verilüp, bi-kazâʾillâhi Teʿâlâ harîk vâkiʿ oldukda, sâyir ocağlar gibi bunlar dahi ıtfâsına saʿy eylemek irâde olunduğuna binâʾen, her bir Ocağ'a birer çift tulumba ile beşer çifte birer kayık ve her bir tulumbaya kırk beş akça yevmiyye ile birer Tulumbacı-başı ve yirmişer akça ile birer Çavuş ve on sekiz akça ile birer Karakullukçu ve on beşer akça ile yirmişer Tulumbacı neferâtı -ki maʿa-zâbitân yirmi üçer neferden kırk altı nefer- tertîb ve iktizâ eden mevâcibleri ocağları sergisine idhâl ü teznîb olundu.