Bâlâda nigâşte-i harîr tahrîr olduğu üzere dağlı eşkıyâsını tedmîr ile Rumeli'yi tathîr mekāsıdına mebnî Anadolu Vâlîsi Vezîr ʿAli Paşa'nın dahi me'mûriyyeti istihsân ve Üsküdar'dan ʿubûrunda sühûlet mülâhaza olunduğu tarafına ifâde vü beyân olunmuşidi. Müşârun ileyh tebeʿât-ı sâbıkasını tehayyül ile müsteşʿir ve baʿzı mahall-i hatîra keşf-i sırr-ı müstetir edüp, itmi'nân-ı tahsîlinden sonra beş-altı bin âdem ile Haydar-paşa Sahrâsı'na [Ü1 156a] gelüp müstekarr olmuşidi. Birkaç gün zarfında askerini Davud-paşa Sahrâsı'na imrâr edüp, kendüsi dahi Küçüksu binişinde Sadrıaʿzam hazretleriyle tebdîlen ʿatebe-i felek-kevkebe-i Mülûkâne'ye vazʿ-ı cebhe-i rıkkıyyet ve kesb-i dest-mâye-i nevâziş ü rağbet eyleyüp, dağlı eşkıyâsına dâir vesâyây-ı Mülûkâne'yi kurt-ı binâgûş-i semʿ ü tâʿat ve meʾmûr olduğu mahalle ʿazîmet eyledi.