Anadolu Kadıʿaskeri olan Müftî-zâde es-Seyyid Mehmed Efendi'nin bir seneden ʿibâret olan müddet-i hükûmeti karîn-i inkızâ ve işbu iki yüz on iki senesi gurre-i Muharrem'inden mutasarrıf olmak üzere Sadâret-i Anadolu'yla sâbıkā İstanbul Kadısı Mehmed Şemseddîn Efendi'nin bâsıra-i ibtihâcı pür-ziyâ olup, Keçeci-zâde o râddede bulunmak hasebiyle [Ü1 155b] hakkında zuhûr eden cerh, te'ehhur-ı merâm-i merhem-i pâye ile dest-nevâzende-i iltiyâm ve Râyif Paşa-zâde İbrâhîm ʿİsmet Beyefendi hakkında dahi lihâza-i Şehriyâr-ı enâm erzânî buyurulup, Muharrem'in on birinde Anadolu Pâyesi'yle kadri bâlâter olup, iki yüz on üç senesi Muharrem'inden zabt ve yevm-i tevcîhinden pâyelerine iʿtibâr olunmak şartıyla Edirne'den munfasıl Mahmûd Efendi-zâde İbrâhîm Efendi, Mekke-i mükerreme ve Edirne Pâyesi olup, Haleb'den maʿzûl Tosyalı ʿAli Efendi'ye Medîne-i münevvere Kazâsı ihsân ve ikisi birden ke-razîʿay-libân ol savb-ı şeref-evbe cemmâze-rân oldular.