Erbâb-ı hiref ve esnâf ve mütevelliyân-ı evkāf tervîc-i mefsedetleri zımnında müfettişlerden mazmûnu mûcib zarar u iʿtisâf olan hücec ü iʿlâmât ahz ve aklâma kayd ve mûcebince emr-i ʿâlî alup, izrâr-ı ʿAmr u Zeyd eyledikleri mütehakkıku'l-vukūʿ olduğuna binâʾen, baʿde-ezîn Sadrıaʿzam ve Şeyhulislâm ve Dâru's-saʿâde [Ü1 149a] Ağası hazerâtının ve sâyirlerinin taht-ı nezâretlerinde ve nezâretsiz evkāfa dâir İstanbul Kadısı ve Haremeyn ve Evkāf müfettişleri ve taşrada olan vekîlleri yollu yolsuz sened olacak ve lede'l-hâce kaydına mürâcaat ile tahsîl-i garaz u merâma vesîle olacak iʿlâmât [Ü2 161a] ü hücec verildikde, Nâzır ve Mütevellî ve sâyirlerin inhâlarıyla Haremeyn Muhâsebesi'ne ve aklâm-ı sâyireye kayd olunmayup, aklâma kaydı murâd olunan senedât evvelâ Bâb-ı ʿâlî'ye takdîm ve lede'l-mutâlaʿa mazmûnları vâreste-i hasâret ü tagrîm olduğu tahkīk olundukdan sonra, fermân-ı ʿâlî ısdâr olunup, iki pençe ve sahh olmadıkça aklâma kayd olunmamak ve esnâfın evkāfa dâhil ve gayr-i dâhil gedik ve umûr-ı sâyirelerine dâir İstanbul mehâkiminden aldıkları senedât dahi evvelâ Bâb-ı ʿâlî'ye takdîm olunup, mahzûrdan sâlim olduğu maʿlûm oldukdan sonra, kezâlik iki pençe ve iki sahh olmadıkça aklâma kayd ve muktezâsı icrâ olunmamak ve iktizâ etmedikçe tuğralı emir verilmamek üzere nizâma rabtı, mübârek Rikâb-ı hümâyûn'a telhîs olundukda, tanzîmine irâde-i hümâyûn teʿalluk edüp, nizâm-ı mezkûr ʿale'd-devâm merʿî olmak içün Haremeyn Muhâsebesi'ne kayd ve iktizâ eden aklâm ve hükkâma ʿilm ü haberleri verildi.