Devlet-i ʿaliyye tarafından düvel-i Avrupa'ya birer sefîr irsâli mukaddemâ karâr-gîr olduğuna binâ'en, Âgâh Efendi İngiltere'ye gönderilüp, Kethudâ Kitâbeti'nden maʿzûl İbrâhîm Efendi Françe'ye ve Penâh Efendi dâmâdı ʿAli Efendi Prusya'ya tertîb olunup, bu tarafda olan Françe Elçisi sâyir düvele irsâl olunduğu gibi Françe'ye dahi bir sefîr irsâlini câ-be-câ tergîb ve cumhûr tarafından vürûdu tahkīk olunan Büyük Elçi'nin vusûlüne taʿvîk olunmuşidi. Françelü'nün Büyük Elçisi bu esnâda dâhil-i hudûd olduğu haberi vürûd edüp, mâ-lezimesini idâre içün Mihmândâr [Ü1 140b] taʿyîn olunmağla, maʿnen Âsitâne'ye gelmiş gibi olup, binâ'en-ʿalâ-zâlik Prusya'ya tasmîm olunan ʿAli Efendi, Françe'ye ve Arabacılar Kâtibi bulunan Nâyilî Efendi, Prusya'ya sefîr nasb ü taʿyîn ve hilʿatler ilbâsıyla kāmet-i istiʿdâdları tezyîn olunduğundan gayri, birer mansıb ile terfîʿ-i şânları maslahat iktizâsından ʿadd olunup, ʿAli Efendi'ye Rebîʿulevvel'in yirmi birinci günü Baş-muhâsebe ve İbrâhîm Efendi'ye tevcîhâtda zabt etmek üzere Anadolu Muhâsebeciliği tevcîh olunup, birkaç günden sonra Nâyilî Efendi'nin Prusya sefâretinden tekāʿüsünü sâbıkā Belgrad Defterdârı [Ü2 151b] olan ʿAli Efendi teferrüs edüp, Prusya'ya gitmeğe tâlib ve fi'l-hâl ilbâs-ı hilʿat ile nâyil-i metâlib oldu.