Mûmâ ileyh bu esnâda baʿzı esbâb ile hasta ve evâsıt-ı Muharrem'de câm-ı hayâtı seng-i ecel ile şikeste olup, Üsküdar'da defîn-i zîr-i türâb ve muntazır-ı rûz-ı Hisâb oldu. Mûmâ ileyh elli târîhinde tengnây-ı ʿademden füshat-serây-ı vücûda gelüp, altmış dört târîhinde Kethudâ Kalemi'ne müdâvemet ve Hayrî Efendi merhûmdan sonra Baş- halîfelik ile kesb-i rifʻat edüp, [Ü2 146b] sefer-i esbakda zümre-i Hâcegân'a lâhık ve baʻdehû Âsitâne'de Kethudâ Kitâbeti'yle akrânını sâbık olmuşidi. Birkaç defʻa ʻazl ü nasb ile hıdmet-i mezkûrede kıyâm ve Hasan Efendi'nin Kethudâlığı'nda dahi Kitâbet'de bulunup, tahte'l-kahr istihdâmından ve her lahza vukūʻ bulan sebb ü düşnâmından ʻâciz olup, âhır-ı kâr Serdâr-ı ekrem bulunan Yûsuf Paşa'nın Hazînedârı'nı püşt ü penâh ittihâzıyla ʻarz-ı mâ-cerâ ve hâdim ü mahdûma nakden ve nes’eten nisâr-ı nakd-i evfâ edüp, “er-Rişâ'u rişâ'u'l-hâce” mefhûmu üzere Kitâbet'den taferât-ı nizâmiyye ile Kethudâlık gibi bir mesned-i refîʻi muhtelis ve küberây-ı tarîkı fart-ı hayret ile nûmîd ü âyis etmişidi. Mûmâ ileyhin evzâʻ-ı şütür-gürbesine Sadrıaʻzam hazretleri ıttılâʻ ve Edirne'ye vusûlünde o mansıb-ı celîli [Ü1 136b] intizâʻ ile Rûhî Süleymân Ağa'ya îdâʻ eyleyüp, cemʻ-i zahîre ʻunvânıyla Sâhib-i tercemeyi ordudan tebʻîd ve kulûb-ı nâsda olan harâret-i gayreti tebrîd etmişidi. Baʻdehû orduya celb ile münâvebe menâsıbında müstahdem ve Âsitâne'ye geldikde, bir-iki defʻa Nişancılık ile mükerrem olup, encâm-ı kâr cihân-ı kâr ü bârından dest-keşîde ve târîh-i merkūmda ʻalkam-ı mevti çeşîde oldu. Mûmâ ileyh evzâʻ-ı dâd ü sitede vâkıf ve mûyu revgandan çekmek sanʻatına ʻârif, hilye-i hüner ü kemâlden sâde ve dünyây-ı denîye şîfte vü dil-dâde idi.