[Ü1 135b] Tertîb-i cedîd üzere sanâyiʿ-i harbiyyeyi teʿallüm eden asâkir-i mansûreye ârâm-gâh olan Levend Çiftliği'ne gâh u bî-gâh ʿuzamây-ı devletin ʿazîmet ü nezâreti, medâr-ı şevk u rağbet olacağı bî-iştibâh olduğuna binâ'en, hâlâ Îrâd-ı Cedîd Defterdârı Reşîd Mustafa Efendi tarafından tertîb-i ziyâfet birle Sadriaʿzam hazretleri daʿvet olunup, Şeyhulislâm Efendi hazretleri hem-ʿinân-ı mürâfakat ve hademe-i Bâb-ı ʿâlî ve Defterdâr Efendi dahi şeref-i maʿiyyet ile kesb-i mefharet ve Çiftlik-i mezkûra vusûllerinde asker-i mezkûrun tahsîl eyledikleri evzâʿ-ı ceng ü sitîz ve istiʿmâl eyledikleri tüfeng ü nebtîz yemm-i kerem-i Âsafî'yi mevc-zîr edüp, asâkir-i merkūmeyi ʿatâyâ ve ru'esâsını hilʿa-i girân-behâ ile hurrem ve baʿdehû tenâvül-i niʿam ve istimâʿ-i elhân-ı sâzende-gân ile izâle-i gamm kılınup, o hılâlde Şehriyâr-ı bende-nüvâz bir kabza mücevher hançer ve bir kıtʿa hatt-ı mekârim-eser ile sadrıaʿzamların taltîf ü iʿzâz ve Genc-i şâygân ile hem-râz-ı taʿbîrât-ı reşîka-i Mülûkâne ile müşârun ileyh hazretlerini hâyiz-i rehîne-i rüchâniyyet ü imtiyâz buyurdular.