Tebedelenli ʿAlî Paşa-oğlu Velî Bey'i dağlı eşkıyâsına meʾmûr Rumeli Vâlîsi Vezîr Hakkı Paşa'nın istikbâline irsâl ve müşârun ileyh dahi mîr-i merkūmu istîsâl-i eşkıyâ hıdmetlerinde istiʿmâl eyleyeceğini ifâde vü tezkîr ve mîr-i mezbûrun silk-i Mîr-i mîrân'a münharıt olmasını niyâz ü tahrîr etmekle, o makūleleri tergīb ve ʿale'l-husûs pederini tatyîb irâdesiyle şehr-i mezkûrda mûmâ ileyhe Mîr-i mîrânlık tevcîh olunduğundan gayri, Bosna-serâyı kurbünde vâkiʿ Yeni-bâzâr'da mütemekkin Mîr-i mîrân'dan İbrâhîm Paşa'nın birâderi ʿAbdî Bey katʿ-ı hudûd mâddesinde bezl ü cûd eylediğini Bosna Vâlîsi Vezîr Hüsâm Paşa inhâ ve Mîr-i mîrânlık ile çırâğ buyurulmasını istidʿâ etmekle, iltimâsı karîn-i isʿâf ve şehr-i mezkûrun on birinci günü mîr-i mûmâ ileyh Rütbe-i Mîr-i mîrânî ile mazhar-ı eltâf oldu.