Sadrıaʿzam Kethudâsı olan Birrî ʿAbdullah Efendi'nin hıdmeti gayr-i meşkûr ve hırs u tamaʿa dâ'ir evzâʿı, taraf-ı Sadru's-sudûr'dan ʿarz-ı huzûr-ı lâmiʿü'n-nûr kılınup, ʿazline müsâʿade ve âharın nasbı irâde olunduğuna binâ'en, işbu Cumâdelûlâ'nın yirmi sekizinci Pençşenbih günü Kethudâlık câh-ı refîʿinden maʿzûl ü mehcûr olup, Rûznâmçe-i Evvel bulunan Mehmed Şerîf Efendi'nin mehâsin-i haslet ve ehâsin-i hıdmeti icmâl ü tafsîl ve hakkında ruhsat-ı Cihân-bânî tahsîl olunup, yevm-i mezkûrda Kethudâlık câh-ı refîʿiyle münbasit ü mürtâh ve münhall olan Büyük Rûznâme ile Firdevsî Mehmed Emîn Efendi ser-germ-i rahîk-i ifrâh oldu.