Müşârun ileyh altmış iki târîhinde bi'l-imtihân medrese ru'ûsuna nâ'il ve doksan birde Haleb Mevleviyyeti'ne vâsıl olup, doksan sekizde Kādî-yi Şâm ve iki yüz birde Mekke-i mükerreme Kazâsı'yla şâd-kâm ve iki yüz dört senesinde İstanbul Pâyesi'yle iʿzâz ve iki yüz beşde Anadolu Sadâreti Pâyesi'yle mümtâz kılınup, iki yüz sekizde Rumeli Rütbesi'ne suʿûd ve târîh-i mezkûrda vücûdu pür-sûdunu nühüfte-i ʿâlem-i şühûd eyledi. Müşârun ileyh esbeğallâhu niʿamehû ʿaleyhi fazl ü ʿilm ile meşhûr ve veraʿ u takvâ ile mezkûr olduğundan başka, Mevleviyyet'e nâ'il oluncaya dek neşr-i ʿulûm-ı nâfiʿa ile meşgūl vakti çok kimseler, zât-ı vâlâsından ahz-ı fünûn-ı nâfiʿa ile gāyet-i kemâlât-ı insâniyyeye mevsûl olmuşlardır. On beş sene mukaddem ʿillet-i pîrî ve zaʿf-ı basar esbâbıyla mahzûn olmuşiken, ʿilmine hürmeten tefavvuk-ı akrândan sıyânet ile refte refte pâyeler ihsânıyla memnûn kılınmışidi. Siniyy-i ʿömr-i ʿazîzi mütenâhiz-i ʿakd-i semânîn bir fâzıl-ı sâhib-i hads ü yakīn idi.