Merkūm, bir zemândan berü Gülefçe ve Yeni-bâzâr semtlerinde ikāmet ve baʿzı iltizâmât ile tahsîl-i refâhiyyet edüp, seferler zuhûrunda Ordu-yi hümâyûn'a asker ve zahîre ile hıdmet ve o etrâfın eşkıyâsını zabt ile haylîce kesb-i teʿayyün ü şöhret etmişidi. Şumnu'da Çavuş-oğlu ve Hirazgrad'da Hacı ʿÖmer-oğlu ve Bâzârcık'da Sırıklı-oğlu, merkūmun bu hâline hased ve defʿ-i mezâhim sûretinde defʿine mukayyed ve her tarafdan şâkîler peydâ ve sû'-i saniʿ u hareketi mesâmiʿ-i evliyây-ı devlete ilkā olunup, teftîş-i mâdde zimnında Kapucu-başı İsmâʿîl Ağa taʿyîn ve te'lîf-i tarafeyn telkīn olunmuşidi. Mûmâ ileyh defʿ-i münâferete muvaffak olmadığından fazla, mugālata-i muhâlifîne firîfte ve vaʿd-i mechûlü'l-incâza şîfte olup, müstahakk-ı iʿdâm olduğunu iʿlâm etmekle, [Ü2 29a] nefîr-i ʿâmm sûretinde üzerine varılacağını merkūm idrâk ile Âsitâne-i saʿâdet'e mâlîde-rû ve ocağına ilticâ edüp, tahlîs-ı nefsi içün çâre-cû olmuşidi. Aʿyânlık sebebi ile merkūm bi'l-külliyye rızây-ı devleti isticlâb edemediğinden o havâlîye dâ'ir baʿzı umûrda vukūʿ bulan terâhî vü ʿinâd merkūma ʿazv ü isnâd olunarak hakkında gayz-ı devlet muzmer ve işbu Muharrem'in altıncı gicesi ser- dâde-i hükm-i kazâ vü kader olup, zabt-ı muhallefâtına mûmâ ileyh İsmâʿîl Ağa ve zimemâtı tahsîline Haffâf-zâde Ahmed Ağa me'mûr ve ol bâbda emr-i ʿâlî şeref-sudûr oldu.