Mûmâ ileyh vaktiyle Şeyhülislâm-ı benâm olan es-Seyyid Feyzullah Efendi'nin mahdûmu Çelebi Mehmed Efendi'nin necl-i necîb ve ferzend-i erîbi olup, altmış sekiz târîhinde Hâric Rütbesi'ne ʿâric ve doksan beş senesinde Galata Mevleviyyeti'yle tahsîl-kerde-i ahad-i mehâric olup, iki yüz üçde [Ü1 27a] Medîne-i münevvere Pâyesi'yle müşerref ve iki yüz sekizde İstanbul Rütbesi'yle zâtı muʿarref olup, zikr olunan târîhde vefât ve tekmîl-i enfâs-ı hayât eyledi. Merhûm tayyibü'l-asl, ʿarîku'n-nesl, dâmen-i ʿismeti levs-i meʿâsîden pâk ve kadr-i müşterek ʿilm ile sâhib-i fehm ü idrâk olup, evkātı mütâlaʿa ve kitâbet ile güzâr ve sebeb-i tevellüd-i âfât u ekdâr olan muhâletat-ı enhây-ı rûzgârdan firâr edüp, dâ'imâ kûşe-güzîn-i halvet ü hamûl ve muhâsebe-i nefs ile mukayyed ü meşgûl olup, cevdet-i hattı, eser-i kalemi olan kütüb ü resâyilden zâhir ü âşikâr ve cihet-i ʿilmiyyesi sıhhat-i kitâbetinden bedîdâr ve arpalık mahsûlünü umûr-ı hâriciyyesine sarf u nisâr edüp, akvât-ı yevmiyyesini ʿarak-ı cebîn ve kedd-i yemîni ile tedârük eylediği sübût-yâfte-i iştihâr olup, ancak bâng-ı hurûs ile bi't-tabʿ me'nûs olmayup, hânesinde beytûtet içün sadâ gelmeyecek mahaller binâ ve baʿîd mahallerde sadâya tesaddî edüp, sadâlarına mâniʿ olmayacak hurûsları sâhiblerini irzâ ile iştirâ ve bu vechile râhatını ibtigā eder idi.