Sâhibetü'l-hayrât, meliketü'l-muhadderât, iklîletü'l-muhsanât, devletli Vâlide Sultân-ı ʿaliyyetü'ş-şân hazretlerinin ibtigā'en li-marzâtillâh ve taleben li-mağfiret-i İlâh civâr-ı hazret-i Hâlid'de binâ vü ihyâsına mübâşeret buyurdukları ʿİmâret-i ʿâmire ve Dâru'z-ziyâfe-i müteberrikeleri -ki resânet-i binâsı taʿne-endâz-ı aʿlâm-ı ehrâm ve sınaʿat-ı inşâsı bânî-yi Havernak olan Sinnimâr'a sebeb-i güzîden-i ibhâmdır- bu esnâda temâm ve vâsıl-ı hayyiz-i hıtâm olmuşidi. Şehr-i mezkûrun yirmi altıncı İsneyn günü müşârun ileyhâ hazretlerinin Kethudâlık hıdmeti celîlesiyle şeref-yâb olan Yûsuf Ağa ʿale's-seher pîşgâh-ı ʿİmâret'e varup, bir-iki yüz kadar sofra ferş ve mevâyid-i mütenevviʿa ihzâr ve nidây-ı ʿumûm ile daʿvet-i kibâr u sigâr edüp, sîr ü câyi ve müşterî vü bâyiʿ, "Mâ lehâ min dâfiʿ" olan sofralara münkasem ve tenâvül-i etʿime-i şehiyye ile mugtenem olup, sipâs-güzârî-yi hazret-i Perverdigârî ʿakabinde ibtidâ müʾessis-i bünyâd-ı dîn ve nigeh-bân-ı kasr-ı müşeyyid-i şerîʿat-i Seyyidü'l-mürselîn olan Şehriyâr-ı bâhirü't-temkînin esâs-ı ʿömr ü devlet ve binây-ı üstüvâr-ı şevket ü Saltanat'ları ilâ-intihâ'i'z-zemân diʿâme-i bekā ile muhalled ve sâniyen sâhibetü'l-hayrât hazretlerinin âsâr-ı hayriyyeleri durdukça zât-ı melekiyyetü's-simâtları [Ü2 16a] hemîşe [Ü1 15b] sıhhat ü ʿâfiyetle mü'ebbed olmak duʿâları tekrîr olundukdan sonra, Binâ Emîni'ne ve muʿtemedlere ve serân-ı ʿameleye ilbâs-ı hilaʿ-i zâhire ve iʿtây-ı nukūd-ı vâfire kılınup ve'l-hâsıl o cemʿiyyetde bulunanların cümlesi birer cihetle memnûn ve ʿavârif-i hakīkıyye-i hazret-i Şehriyârî'ye mülâbes ü makrûn oldular. Bu makūle âsâr-ı hayriyye içün inşâd-ı târîh de'b-i kadîm olduğuna binâ'en, Vehbî Efendi'nin “İmâret-i ʿâmire hıtâmında ʿarz eylediği târîh ve ʿİmâret kurbünde inşâ olunan sebîle Galata Şeyhı Gâlib Efendi'nin takdîm eylediği târîh, tahlîd-i zikr-i cemîl içün bu makāleye tezyîl olundu. [Nazm]: Zihî târîh-i Vehbî feyz-i rûh-ı Çâr-yâr ile “İmâret buldu me'vâ-yı Ebî Eyyûb Ensârî (عمارت بولدى مأوى ابی ايوب انصارى) [Nazm]: Gâlib, kalemden akdı bil târîhi hem-çûn selsebîl Ashâba Zemzem hem sebîl ʿayn-ı safây-ı Mihrişâh (اصحابه زمزم هم سبيل عين صفای مهرشاه)