Nezâret-i hazret-i Şeyhulislâmî'de âsûde olan evkāfdan tevliyyeti zât-ı semîhîlerine meşrûta olan Kılıç ʻAli Paşa Câmi'nin mahfili ʻan-asl münhafız u teng ve baʻzan tekâsür-i cemâʻat sebebi ile tazâyuk-ı kulûb hâsıl olup, taʻdîl-i erkân ve huzûr-ı cenân hâric-i dâyire-i imkân olmağla, musallî ve gayr-i musallî yek-dîgere mümâsil ü hem-reng olup, iʻlâ vü terfî ve tezyîn ü tevsîʻi taraf-ı hazret-i Fetvâ-penâhî'den iltizâm ve Zât-ı hümâyûn'a lâyık resm ile dâyire-i mezkûre tarh u itmâm olunduğu taraf-ı kâmilü'ş-şeref-i Şehriyârî'ye ʻarz u ifhâm olundukda, câmiʻ-i mezkûrda edâ-yı salât-ı Cumʻa etmek dâʻiyesi havâlî-kerd-i zamîr-i ilhâm-tahmîr-i Şâhâneleri olmağla, işbu Muharrem'in ikinci Cuma günü debdebe-i Mülûkâneleri'yle câmi‘-i mezkûru mâl-â-mâl envâr-ı behcet ü behâ ve dâyire-i mezkûrenin resm-i matbûʻ u dil-keşi muvâfık-ı tab‘-ı Cihân-ârâları olduğuna binâ'en, cenâb-ı hazret-i Fetvâ-me'âb'ı bir nev' 'ârife-i Mülûkâne ile tefrîh ve haklarında derkâr olan hüsn-i teveccüh-i Şâhânelerin tasrîh kasdıyla iyâb u zehâb-ı Mülûkâne'de hidmet-i mücmere-keşî [175a] ile kesb-i şeref ü rağbet ve ber-vech-i niyâbet ‘arz-ı firûtenî vü meskenet eden mahdûm-ı hasîb ve necl-i necîbleri hâlâ Galata Kadısı es-Seyyid 'Abdullah Efendi cenâblarını Mekke-i mükerreme pâyesiyle mükerrem ve dîbâ-yı zîbâ-yı hususiyyet ü ‘ubûdiyyetini tamgā-yı bî-hemtâ-yı mekârim ile tırâzende vü muʻlem buyurup, İmâm-ı Evvel-i Sultânî dahi bu ‘inâyet-i Tâcdârî'den hisse-mend-i nevâle-i iltifat u kerem olup, saff-ı mezkûrda vâki‘ cemâ‘at-i mevâliye mu'temm oldu.