Kapudân-ı deryâ Giridî Vezîr Hüseyin Paşa Karadeniz Boğazı'ndan hurûc ve Hacıbey Limanı'na vülûc edüp, liman-ı mezkûrdan yârî-yi nesîm-i feth ü zafer ile refʻ-i lenger ve Pirezen Adası'nı güzergâh-ı Donanma-yi meyâmin-makarr etmekden nâşî, ahvâl-i aʻdâya vukūf içün ada-i mezkûreye âdemler irsâl edüp, karağol şeklinde aʻdâ tarafından taʻyîn olunan birkaç nefer eşkıyâ-yı Kazak kudûm-i Donanma-yi hümâyûn'da ittifâk edüp, karârı firâra tebdîl ve adada bulunan altı kıtʻa topu Donanma-yi hümâyûn'a nakl ü tahmîl eyledikden sonra, Kılburun pîşgâhında heybet-i düşmen-hırâş ile mürûr ve Avlita Limanı manzûr oldukda, deryâ cengi edenler miyânında daʻvet-i muhâbereye mevzûʻ olan baʻzı ʻalâyim izhâr ve düşmen tarafından katʻā sît ü sadâ zâhir olmadığından ʻavdete karâr verüp, Özi Kalʻası bedîdâr oldukda beş on kıtʻa sagīr sefîneleri kemîn-gâh-ı fursata taʻbiyeden sonra Kanca-başı bi'n-nefs Özi sularına idhâl ve âmâde-i ceng [26b] ü cidâl olduğunu esvât-ı hâyile-i müdâfiʻ ile âzân-ı summ-ı aʻdâya îsâl eyledikde, aʻdâ-yı dîn Kanca-başı'nın infirâdını tehayyül ile ahz u zabtını tehvîn ve "Hâzır şikâr ayağımıza geldi" deyü mahâlib-i gurûr u istikbârı tîz ü keskîn edüp, fırkateyn şeklinde bir kıtʻa sefîneye on kıtʻa sefâyin-i sagīre terfîk eylediklerini müşârun ileyh tahkîk eyledikde fi'l-hâl hâyiz-i gımâr-ı harb ve süfün-i aʻdâyı kemîn-gâha celb edüp, der-kemîn olan guzât zafer-karîn top dâneleriyle büyük gemilerini misâl-i gırbâl eylediklerinden gayri, derûnunda bulunan keferenin bir mikdârı garîk-i bahr-ı demâr ve bir mikdârı sagīr sefînelere rükûb ile geldikleri semte firâr ve zikr olunan sefîne ka‘r-ı deryâda nâ-bûd ve sûret-i zafer-mir’ât vukūʻda bu vechile rû-nümûd olup, kemâ-kân Hâcıbey Limanı Donanma-yi hümâyûn'a makarr olduğu müşârun ileyh tarafından muharrer olmağla, zuhûra gelan ikdâm u gayreti mûcib-i tezâyüd ü kadr-i rifʻati olup, iltifât ü nevâzişe makrûn ve fîmâ-baʻd ibrâz-ı âsâr-ı merdânegî etmek üzere ‘arak-ı cemʻiyyetini tahrîk eder ʻibârât ile meşhûn, tarafına irsâl-i emr-i hümâyûn kılındı.