Kazasker-i Anadolu-yi sâbık Rumeli sadâreti pâyesi olan Birâder-zâde Yakūb Efendi bir müddetden berü maraz-ı sill ile marîz ve hasta ve işbu şehr-i Recebül-ferdin ikinci cumʿa günü dağdağa-i âlem-i fânîden reste oldu. Müşârün-ileyh nesl-i âl-i Hasan-Can'dan Birâder-zâde Mustafa Efendi'nin mahdûmu olup bin yüz yirmibeş târîhinde tevellüd ve kırkaltı târîhinde hâric ile evvelîn pâye-i merâtib-i ilmiyyeye tesâʿüd edüp yetmişsekizde Diyârbekir'e ve seksenaltıda Edirne'ye ve doksanbirde Medine'ye kadı olup doksandokuzda İstanbul pâyesiyle isʿâd ve ikiyüz senesi Rebîʿül-âhirinin onikisinde Anadolu pâyesiyle dil-şâd ve sene-i mezkûre Cumâdel-âhiresinin onbeşinci günü bilfiʿil Anadolu sadâretine isʿâd kılınup tekmîl-i müddet akabinde Rumeli pâyesiyle nâil-i meserret olmuşiken vech-i muharrer üzere Recebin ikinci cumʿa günü fevt oldu. Müşârün-ileyh sûfî-nihâd vâlâ-nijâd arîk ve hasîb ve asîl ve edîb bir zât olup aded-i sinîn-i ömrü yetmişaltıya mütekārib idi.