Cerce'ye karîb mahalde bundan akdem asâkir-i sultânî ile usâtın muhârebeleri vâki' olup bi-hikmetillahi te'âlâ tarafeyn perîşân ve gâlib ve mağlûb ma'lûm olmayarak muhâlifîn Cerce'ye ve asâkir-i pâdişâhî Mısır'a şitâbân olmuş idi. Bir müddetten sonra bugāt-ı mezkûre var kuvvetlerini bâzuya getirüp iddihâr etdikleri emvâl-i firâvânî eclâf-ı aʿrâba ve sâir serseri geşt ü güzâr eden cündî ve mağribîlere tevzîʿ edüp Mısır üzerine hareket etdikleri maʿlûm oldukda kapudan paşa hazretleri derhâl mevcûd olan kalyoncuları kırlangıç sefînelerine teşhîn ve riyâle kapudaniyle Çalpâkî-zâde Ali Bey'i üzerlerine başbuğ taʿyîn edüp tarîk-i nehri (294-b) sedd akabinde Mısır defterdârı Ali Bey'i dahi baʿzı ümerâ ve asâkir-i Mısriyye ile cânib-i şarkdan ihrâc ve hafr olunan meterislere taʿbye ve idrâc ve vezîr-i müşârün-ileyh dahi Mısır'a üç sâʿat mesâfe olan mahalde darb-ı hiyâm ve mukābilinde vâkiʿ Çize karyesine imrâr-ı asker-i zafer-encâm edüp dâiren-mâdâr meterisler ile emr-i takviye ve istihkâm itmâm olundukadan sonra bi'n-nefs kendüleri dahi Cerce'ye mürûr etmişler idi. Saferül-hayrın onüçüncü günü ale's-seher zümre-i usât zuhûr ve Çize meterislerine hücûm eylediklerinde meterislerde mevcûd olan asker-i zafer-rehber mukābele ve dört-beş sâʿat merdâne mukātele etmeleriyle avn-i Hak ile gürûh-ı aʿdâ münhezim ve asker-i sultānî zâfir ve gānim olup geldikleri semte firâr eylediklerini ve bundan sonra beş-altı bin kadar asker ile vezîr-i müşârün-ileyh taʿkîblerini irâde edüp kutr-ı Mısır'dan ihrâclarmı tasmîm ve kendüleri bi'n-nefs azîmet ve hareket edeceklerini bu defʿa vürûd eden tahrîrâtlarında bast u takdîm etmeleriyle bir müddetden berü enfüs-i nâsda te'ehhür-i ahbâr-ı Mısriyyeden terettüb eden helecân ve iztırâb bu vesîle ile zâil ve kulûb-ı hayr-hâhân-ı devletde ferâh ve meserret hâsıl oldu.