Devlet-i aliyye-i ebediyyü'l-karâr ile müceddeden akd-i sulh eden İspanya kralı bundan akdem der-i devlet-medâra hedâyâ ile gönderüp devlet-i ebed-müddet tarafından dahi bir sefîr irsâl olunması Âsitâne'de mukīm olan elçisi birkaç defʿa takrîriyle istidʿâ ve bu vesîle ile ebnâ-yı cinsleri beyninde kesb-i mübâhât ve iftihâr edecekleri inhâ eylediğinden gayri bu makūle musâlaha akabinde beyne'd-düvel ahad-i hümâ âhare sefîr ve hediye irsâl etmek kāʿide-i kadîmeden olduğuna binâen zikr olunan İspanya kralına mutavassıtü'l-hâl bir sefîr gönderilmesi bir zamândan berû musammem ve Fas hâkimi Mevlây Mehmed cenâblarının dahi Devlet-i aliyye'ye temahhuz ve ihlâsı ber-vech-i etemm olup birkaç defʿa hedâyâ ve süferâ irsâliyle ifâ-yi lâzıme-i ihtisâs etmişidi. Müşârün-ileyh cenâbları tarafına hedâyâ-yi mülûkâne ile elçi gönderilmesi istihsân olunduğuna binâen bu abd-i fakīr-i kesîrü't-taksîr İspanya'ya ve hâcegân-ı Dîvân-ı hümâyûndan Azmî Ahmed Efendi Fas'a elçi nasb olunup inşâ-Allâhü teʿâlâ evvel-bahâr-ı huceste-âsârda Âsitâne'den fekk-i lenger-i ikāmet etmek üzere işbu şehr-i Rebîʿül-evvelin yedinci perşembe günü huzûr-ı sadr (292-b) ü's-südûrda dûş-i âcizânemize ilbâs-ı hilʿat buyurulup yevm-i harekete dek kemâkân vakāyiʿ-i Devlet-i aliyye'yi bu abd-i âciz zabt edüp hareket akabinde vekâlet ile hizmet-i mezkûrenin idâresi irâde buyuruldu.