Defterdâr-ı vakt bulunan Hasan Efendi bir müddet umûr-ı defterîyi idâre edüp bu esnâda baʿzı avârız ile azli iktizâ eylediğine binâen işbu Saferü'l-hayrın onikinci isneyn günü mûmâ-ileyh câh-ı mezkûrdan maʿzûl ve hânesinde ikāmet ile duʿâ-yı devlete meşgûl oldu. Tersâne-i âmire emîni olan Ahmed Nazîf Efendi mukaddemâ defterdâr iken mîrîyi sıyânet ve mizâc-ı vakte göre hareket edüp bundan böyle dahi mûmâ-ileyhden irâde-i devlete muvâfık hizmet bürûzu meczûm olmakdan nâşî «el-avd-i Ahmed» mefhûmu üzere câh-ı mezkûr kemâ-sebak zâtına elyak görülüp yevm-i mezkûrda defterdâr-ı şıkk-ı evvel nasb ve taʿyîn ve huzûr-ı sadrü's-südûrda dûş-i istihkākı hilʿat-ı seniyye ile tezyîn olunup münhâl olan Tersâne emâneti dahi erbâb-ı servet-iktidârdan kassâb-başı El-hâc İsmâʿîl Ağa'ya ber-vech-i ilhâk tevcîh olundu.