Mîrimîrân-ı kirâmdan İbrâhîm Paşa tevâlî-i iyâb ü zihâb ile umûr-ı Hicâz'a âşinâ olduğuna binâen bu esnâda cerdeci nasb olunması savâb-dîd-ı ukalâ olmağla işbu Saferül-hayrın ikinci günü paşa-yı mûmâ-ileyhe Trablus-Şam eyâleti tevcîh ve ihsân ve cerde başbuğluğu ünvânıyla fâikü'l-akrân kılınup Kars muhâfazası dahi bâ-rütbe-i mîrimîrânî tezkereci İbrâhîm Efendi-zâde kapucu-başı Nuʿmân Ağa'ya inâyet buyurulup İsmâʿîl cânibi seraskeri sadr-ı sâbık Ali Paşa dahi Silistre'de ikāmet ile Özi muhâfızı olan Aydoslu Vezîr Mehmed Paşa İsmâʿîl mühimmât muhâfazasına me'mûr ve Vezîr Mahmûd Paşa Özi muhâfızı olmak üzere ısdâr-ı menşûr kılınup karîbü'l-ahde Diyârbekir Eyâleti tevcîh olunan sadr-ı esbak Yeğen Mehmed Paşa sâl-hurde ve pîr olduğundan bahs ile Rumeli cânibinde (291-b) bir mansıb temennî eylediğine binâen eyâlet-i mezkûre Hanya muhâfızı olan Vezîr İzzet Mehmed Paşa'ya tevcîh ve müşârün-ileyhe dahi berû tarafa vusûlü haberi şâyiʿ oldukda bir mansıb ihsân olunacağı vaʿd buyuruldu.