Ümerâ-i bed-ârâ taraflarından ahâlî-i Mısır'a nev be-nev tahmîl olunan tekâlîf-i şâkkanın tahfîfiyle hadd-i iʿtidâle tenzîli matlûb-ı hümâyûn olup hattâ ahâlî-i Mısır bu inâyet-i mülûkiyye ile tebşîr olunmuşlar idi. Mısır vâlisi sadr-ı esbak Yeğen Mehmed Paşa'nın bu esnâda tamaʿa dâ'ir baʿzı hareketi zâhir olup aks-i ümîdlerini intâc ve müşârün-ileyhin her hâlde azlini muhtâc olduklarını ahâlî-i mezkûre arz ve mahzarlariyle ifâde etmeleriyle derhal vezîr-i müşârün-ileyh azl olunup eyâlet-i Mısır ile el-yevm ol havâlide bulunan Vezîr Güğeği Abdi Paşa ber-murâd ve münhal olan Diyarbekir eyâletiyle hıtta-i Mısır'dan selefi ibʿâd kılınup Arabistan taraflarının dahi bu esnâda vüzerâ-yı ʿizâmdan hulüvvi münâsib olmayup (288-a) bâ-husûs Milli Timur tuğyânı derkâr olduğundan vüzerâ-yı ʿizâm meyânında kuvvet-i askeriyye ile benâm olan Vezîr Battal Hüseyin Paşa'ya Haleb Eyâleti ve selefi Vezîr Elhac Mustafa Paşa'ya Erzurum Eyâleti tevcîh olundu.