Adana mütesellimi olup Azâz ve Kilis ve Payas muhâfazası şartiyle ihrâz-ı rütbe-i mîrimîrânî eden Abdullah Paşa ile Adana ahâlisi beyninde nizâʿ ve cidâl vâkiʿ ve tarafeynden birkaç âdem telef ve zâyiʿ olduğundan gayri paşa-yi mûmâ-ileyhin hevâdârları dekâkîn ve esvâkı yağma ve gāret ve fukarâ ve zuʿafâyı mübtelâ-yı zarar u hasâret eylediklerini ahâli-i Adana arz ve mahzarlariyle ifâde ve müftî-i belde ile birkaç nefer kimseyi (273-b) li-ecli'l-iştikā Âsitâne-i saʿâdet'e firistâde etmeleriyle paşa-yi mûmâ-ileyhin beylerbeyiliği refʿiyle tağrîb ve iclâsında husûl-i nizâm-ı belde melhûz olduğuna binâen derhâl mîrimîrânlığı refʿ ve Magosa kalʿasına nefy olunup ahâlinin iddiʿâ etdikleri hukūk Adana'da müvekkili ile şerʿân rü'yet olunmak bâbında bâ-emr-i âlî mübâşir taʿyîn olunduğundan gayri karîbü'l-ahdde uhdesine ihâle ve tevfîz kılınan emr-i muhâfaza Haleb vâlisi Vezîr Mustafa Paşa'nın Payas kalʿasına muhâfız nasb etdiği İmâm Ağa'ya ihâle olundu.